لاہور — وزیر اطلاعات و ثقافت پنجاب عظمیٰ بخاری نے رات گئے لاہور کے معروف تھیٹرز پر اچانک چھاپے مارے، جس کے دوران صفائی اور انتظامی معیارات پر سخت تنقید کی۔ انہوں نے پرنس تھیٹر، محفل تھیٹر اور تماثیل تھیٹر کا تفصیلی معائنہ کیا، جہاں انہوں نے ڈریسنگ رومز، کیفے ٹیریا اور اسٹیج کا جائزہ لیا۔
وزیر اطلاعات نے تھیٹروں میں ناقص صفائی، انتظامی کوتاہیوں اور غیر اخلاقی مواد پر سخت ناراضی کا اظہار کیا۔ انہوں نے کہا کہ پنجاب کے تھیٹرز میں بیہودگی اور بے حیائی کو برداشت نہیں کیا جائے گا۔ اس موقع پر کئی فنکاروں بشمول ساجن عباس، نیلی، صائمہ خان، نایاب خان اور سونو بٹ کو انتباہ جاری کیا گیا۔
عظمیٰ بخاری نے کہا کہ اگر کوئی فنکار یا تھیٹر انتظامیہ طے شدہ معیارات کی خلاف ورزی کرے گی تو اس پر سخت پابندیاں عائد کی جائیں گی۔ انہوں نے پنجاب آرٹس کونسل کے افسران کے کام پر بھی تشویش کا اظہار کیا اور کہا کہ تھیٹروں کو معیاری تفریح کا مرکز بنانے کے لیے تمام فریقین کو اپنی ذمہ داریاں پوری کرنی ہوں گی۔
