کراچی (25 مارچ): ایدھی فاؤنڈیشن 4.0 ملین امریکی ڈالر کے منصوبے “بلقیس اینڈ عبدالستار ایدھی – بریسٹ ریڈی ایشن بے” کے لیے ریڈی ایشن آنکولوجی جے پی ایم سی کراچی کو فنڈز فراہم کر رہی ہے ،جنھیں پیشنٹ ایڈ فاؤنڈیشن (PAF-JPMC) اور حکومت سندھ (GOS) کے زیر انتظام چلایا جائے گا۔ بریسٹ کینسر خواتین میں اموات کی ایک بڑی وجہ ہے۔ پاکستان میں ہر سال تقریباً 30 ہزار نئے بریسٹ کینسر کے مریضوں کی تشخیص ہوتی ہے۔ تقریباً تمام الیگننٹ بریسٹ کینسر کے مریضوں کو سرجری، کیموتھراپی اور ریڈی ایشن تھراپی کی ضرورت ہوتی ہے۔ سرجری اور کیموتھراپی کی سہولیات تو پبلک اور پرائیویٹ سیکٹر میں دستیاب ہیں لیکن ریڈی ایشن تھراپی کے لیے مناسب وقت پر سلاٹس دستیاب نہیں ہوتے کیونکہ ملک میں لینیئر ایکسیلیٹرز کی کمی ہے۔ پاکستان میں زیادہ تر مراکز 2D/3D CRT کے ذریعے بریسٹ کینسر کا علاج کر رہے ہیں جبکہ دنیا بھر میں جدید ترین معیار IMRT/VMAT ریڈی ایشن تھراپی ہے جو چند ہی مراکز پر دستیاب ہے لیکن اس کی قیمت عام آدمی کی پہنچ سے باہر ہے۔ ریڈی ایشن کو صحیح مقام پر پہنچانے کے لیے دنیا میں ایک نئی ٹیکنالوجی متعارف کرائی گئی ہے: سرفیس گائیڈڈ ریڈیو تھراپی (SGRT)، ڈیپ انہیلیشن بریتھ ہولڈ (DIBH)، یہ ٹیکنالوجی صحت مند اعضاء کو غیر ضروری ریڈی ایشن سے بچاتی ہے۔ فی الحال پاکستان میں SGRT/DIBH کی سہولت دستیاب نہیں ہے۔ یہ ٹیکنالوجی خاص طور پر نوجوان خواتین کو غیر ضروری ریڈی ایشن سے بچانے میں اہم کردار ادا کرتی ہے۔ ان شاء اللہ بلقیس اور عبدالستار ایدھی – بریسٹ ریڈی ایشن بے اگلے 12 ماہ میں اپنی خدمات شروع کر دے گی۔ روزانہ 160 بریسٹ کینسر مریضوں کو مفت علاج کی سہولت جدید ہیلکس ٹوموتھراپی یونٹس پر فراہم کی جائے گی۔ ان یونٹس میں فین بیم سی ٹی سکینرز کی نئی ٹیکنالوجی بھی ہوگی جو *ٹیومر کی صحیح پوزیشننگ کرے گی اور 360 ڈگری ہیلیکل موڈ میں ریڈی ایشن دے گی۔ اس کے علاوہ SGRT/DIBH کی سہولت بھی ہوگی جس سے دل کو غیر ضروری ریڈی ایشن کا کوئی خطرہ نہیں ہوگا۔ حکومت سندھ نے بھی عہد کیا ہے کہ وہ مشینوں کی مرمت اور دیکھ بھال کے لیے ضروری فنڈز فراہم کرے گی تاکہ اس منصوبے کا سلسلہ بلا رکاوٹ جاری رہ سکے۔ ہمارے مذہبی و ثقافتی اقدار اور مریضوں کے آرام کو مدنظر رکھتے ہوئے بلقیس اور عبدالستار ایدھی بریسٹ ریڈی ایشن بے پر کام کرنے والے تمام ڈاکٹرز، ٹیکنیشنز اور نرسز خواتین ہوں گی۔ PAF-JPMC حکومت سندھ کے ساتھ پبلک پرائیویٹ پارٹنرشپ (PPP) میں کام کر رہا ہے۔ اب تک JPMC کے بستر کی گنجائش 1100 سے بڑھا کر 2208 تک پہنچا دی گئی ہے جبکہ 600 بستروں پر مشتمل نئے منصوبے زیر تکمیل ہیں۔ JPMC کا ریڈی ایشن آنکولوجی ڈیپارٹمنٹ دنیا کا واحد مرکز ہے جو سائبر نائف اور ٹوموتھراپی جیسی جدید ترین ٹیکنالوجی کے ساتھ مکمل مفت کینسر کا علاج فراہم کرتا ہے جس میں قومیت، مذہب یا نسل کی کوئی تفریق نہیں۔ اب تک پاکستان کے 167 شہروں اور 15 ممالک کے مریضوں نے اس مفت سہولت سے فائدہ اٹھایا ہے۔
ڈاکٹر طارق محمود (ٹی آئی)
پروفیسر ایمریٹس، ریڈی ایشن آنکولوجی،
پیٹینٹس ایڈ فاؤنڈیشن، JPMC، کراچی۔
