کراچی: نیشنل یونیورسٹی آف سنگاپور نے اینٹی مائیکروبیل ریزسٹنس سے شرح اموات میں کمی لانے کے لیے کی گئی تحقیق میں شاند ار کامیابی پر ڈاؤ انسٹی ٹیوٹ آف بائیولوجیکل بائیوکیمیکل اینڈ فارماسیوٹیکل سائنسز(آئی بی بی پی ایس) کو” ریسرچ ایکسی لینس ایوارڈ 2025″سے نواز دیا، ایوار ڈ کا حصول ڈاؤ آئی بی بی پی ایس کے لیے تحقیق کے میدان میں نمایاں پیش رفت ہے، حال ہی میں ڈاؤ یونیورسٹی کے ذیلی ادارے آئی بی بی پی ایس نے طبی بنیاد پر اینٹی مائیکروبیل ریزسٹنس سرویلنس نیٹ ورک (ایکورن ہے) کے موضوع پر تحقیق کی جس کا مقصد خون کے انفیکشنز (بی ایس آئی) اور وینٹی لیٹر ایسوسی ایٹڈ نمونیا(وی اے پی) کے ساتھ اسپتال سے ہونے والے (ہوسپٹل ایکوائرڈ ) انفیکشن پرتوجہ مرکوز کرنا ہے، 
ڈاؤ-آئی بی بی پی ایس نے نیشنل یونیورسٹی آف سنگاپور کے اشتراک سے “اے ایم آر” پر تحقیق کی اور عالمی سطح پر 41 تحقیقی مراکز کے شانہ بشانہ کلینیکل ٹرائلز بھی کیے، یہ تحقیق آئندہ برسوں میں نئی تبدیلیوں کا باعث بن سکتی ہے جس سے شرح اموات میں کمی لائی جاسکتی ہے جو حالیہ تحقیق کے مطابق لگ بھگ 25 فیصد ہے، ابتدائی طور پر کم اور درمیانی آمدن والے ممالک کے لیے یہ تحقیق کرنا چیلنجنگ معلوم ہوتا ہے کیونکہ اس کے لیے تربیت یافتہ افرادی قوت اور وسائل درکار ہیں ، ڈاؤ یونیورسٹی آف ہیلتھ سائنسز نے انتھک کوششوں سے اسے ممکن بنایا ،یہ تحقیق کسی جراثیم کی مزاحمت (اینٹی مائکربیل ریزسٹنس )میں کمی لانے کے لیے ملٹی ڈرگ ریزسٹنٹ انفیکشنز کو ہدف بنانے کے کلینیکل ٹرائلز کے لیے بنیادی ڈیٹا بھی فراہم کرتی ہے۔
