لاڑکانہ (بیورو رپورٹ) لاڑکانہ میں دعوت اسلامی کے مرکز فیضان مدینہ میں سو سے زائد عاشقان رسول ﷺ، اللہ کی رضا اور خوشنودی کے لیے 30 دن کیلئے اعتکاف میں بیٹھ گئے، جب کہ دعوت اسلامی کے تحت پاکستان کے چاروں صوبوں کے ہزاروں عاشقان رسول یکم رمضان سے فیضان مدینہ مراکز میں بھی بیٹھ گئے ہیں، جہاں پر تہجد نماز ، نماز اشراق، نماز چاشت، صلوات اوابین، صلوٰۃ تسبیح اور نماز توبہ وغیرہ میں وقت گزاریں گے۔ دوسری جانب دعوت اسلامی کے بین الاقوامی مرکز فیضان مدینہ کراچی میں 5000 سے زائد عاشقان رسول ﷺ اور صوبہ پنجاب کے دارالحکومت لاہور سے خصوصی اسپیشل ٹرین کے ذریعے دعوت اسلامی کی مرکزی مجلس شوریٰ کے رکن حاجی یعفور عطاری کی نگرانی میں کراچی اعتکاف کیلئے پہنچ گئے ہیں، اس 30 روزہ اعتکاف میں دعوت اسلامی کے امیر اہلسنت حضرت علامہ مولانا محمد الیاس عطار قادری ہزاروں عاشقان رسول صلی اللہ علیہ وسلم کے ساتھ سحری و افطاری کے اوقات میں ملاقاتیں کریں گے۔ اس طرح یہ سلسلہ دعوت اسلامی کے تمام مرکز فیضان مدینہ میں چاند رات تک جاری رہے گا۔ اس طرح ہزاروں عاشقان رسول صلی اللہ علیہ وسلم کا قیام اور سحری افطار کے تمام انتظامات دعوت اسلامی کی زیر نگرانی کیے جا چکے ہیں۔
