دورہ نیوزی لینڈ کیلئے قومی ٹیم میں 5 سے 6 تبدیلیوں کا امکان
بابر اعظم سمیت 5 سے 6 سینئر کھلاڑیوں کو آرام کرایا جائے گا، اسکواڈ کا اعلان تین سے چار روز میں کیے جانے کا امکان ہے، ذرائع کا دعویٰ
ذرائع کا کہنا تھا کہ چیئرمین پاکستان کرکٹ بورڈ (پی سی بی) محسن نقوی کی نیشنل کرکٹ اکیڈمی میں ڈومیسٹک کے پرفارمرز سے ملاقات کی۔
ملاقات میں چیئرمین پی سی بی نے کھلاڑیوں کے مسائل سنے، ملاقات میں حیدر علی، معاذ صداقت، محمد سلیمان، خواجہ نافع، سعد مسعود، آفاق آفریدی، مبصر خان، فیصل اکرم، قاسم اکرم، عرفات منہاس، مبصر خان، مرزاطاہر بیگ، احمد دانیال، علی رضا، محمد ابتسام سمیت دیگر کھلاڑی موجود تھے۔
ذرائع نے بتایا کہ دورہ نیوزی لینڈ کے لیے ان 16 کھلاڑیوں میں سے 5 سے 6 نوجوان کھلاڑیوں کا انتخاب کیا جائے گا، دورہ نیوزی کے لیے اسکواڈ کا انتخاب موجودہ سلیکشن کمیٹی کرے گی۔
ذرائع کا کہنا تھا کہ اسکواڈ کا اعلان تین سے چار روز میں کیے جانے کا امکان ہے۔
واضح رہے کہ آئی سی سی چیمپئنز ٹرافی میں مسلسل دو شکستوں کے ساتھ چند روز ہی پاکستان کا سفر تمام ہوگیا تھا۔
19 فروری کو آئی سی سی چیمپئنز ٹرافی 2025 کے افتتاحی میچ میں نیوزی لینڈ نے پاکستان کو 60 رنز سے شکست دے دی تھی، 321 رنز کے تعاقب میں قومی ٹیم 260 رنز ہی بناسکی تھی۔
نیشنل بینک کرکٹ اسٹیڈیم کراچی میں کھیلے گئے میچ میں نیوزی لینڈ نے پہلے بیٹنگ کرتے ہوئے مقررہ 50 اوورز میں ول یونگ اور ٹام لیتھم کی سینچریوں کی بدولت 5 وکٹوں کے نقصان پر 320 رنز بنائے تھے، جس کے جواب میں قومی ٹیم 47.2 اوورز میں 260 رنز پر ہی ڈھیر ہوگئی تھی۔
23 فروری کو انٹرنیشنل کرکٹ کونسل ( آئی سی سی) کے میگا ایونٹ چیپمئنز ٹرافی میں ہائی وولٹیج ٹاکرے میں بھارت نے ویرات کوہلی کی شاندار سینچری کی بدولت پاکستان کو 6 وکٹوں سے شکست دے دی تھی۔
دبئی کرکٹ اسٹیڈیم میں کھیلے گئے میچ میں بھارتی ٹیم کھیل کے ہر شعبے میں پاکستانی ٹیم پر حاوی رہی، جبکہ شاہینوں نے ناقص بیٹنگ کے بعد باؤلنگ اور فیلڈنگ میں بھی قوم کو مایوس کیا تھا۔
27 فروری کو چیمپیئنز ٹرافی میں پاکستان اور بنگلہ دیش کے درمیان میچ بارش کے باعث منسوخ کردیا گیا تھا، جس کے بعد دونوں ٹیموں کو ایک، ایک پوائنٹ ملا تھا۔
جس کے بعد پاکستان اور بنگلہ دیش کا سفر تمام ہو گیا تھا۔
واضح رہے کہ پاکستان ٹیم دورہ نیوزی لینڈ میں 5 ٹی 20 اور 3 ون ڈے میچز کی سیریز میں حصہ لے گی۔
پاکستان اور نیوزی لینڈ کے درمیان پہلا ٹی 20 انٹرنیشنل کرائسٹ چرچ میں 16 مارچ، دوسرا ڈونیڈن میں 18 مارچ، تیسرا ٹی 20 آکلینڈ میں 21 مارچ، چوتھا میچ 23 مارچ کو ماؤنٹ مونگانوئی اور پانچوں اور آخری ٹی 20 ویلنگٹن میں 26 مارچ کو کھیلا جائے گا۔
تین ون ڈے انٹرنیشنل میچوں کی سیریز کا پہلا میچ نیپیئر 29 مارچ، دوسرا میچ 2 اپریل 2025 کو ہیملٹن اور تیسرا میچ 5 اپریل کو ماؤنٹ مونگانوئی میں منعقد ہوگا۔
