لاڑکانہ( رپورٹ محمد عاشق پٹھان ) پاکستان پیپلز پارٹی لیڈیز ونگ کی مرکزی صدر ایم پی اے فریال تالپور سے صدارتی ہاؤس نوڈیرو میں لاڑکانہ پریس کلب کے صدر مرتضیٰ کلہوڑو اور جنرل سیکرٹری نوید لاڑک کی قیادت میں صحافیوں کے وفد نے ملاقات کی، ملاقات میں امن و امان، ترقیاتی کاموں سمیت دیگر اہم امور پر تبادلہ خیال کیا گیا، اس موقع پر لاڑکانہ پریس کلب کے صحافیوں سے غیر رسمی گفتگو کرتے ہوئے ایم پی اے فریال تالپور نے کہا کہ کراچی میں نشے کے معاملے پر نوجوان کا قتل انتہائی افسوسناک ہے، ضلع لاڑکانہ کے رہائشیوں کو چاہیے کہ وہ بروقت پولیس کو آئیس، منشیات، اور جوئے کے اڈوں کے متعلق آگاہ کریں تاکہ معاشرے سے اس طرح کی برائیوں کا خاتمہ کیا جا سکے،
انہوں نے کہا کہ لاڑکانہ میں انڈسٹریل ٹیکس فری زون کے قیام اور گیس کی فراہمی کے حوالے سے وفاقی حکومت سے بات کی ہے شہر میں سیف سٹی سسٹم کو اپ گریڈ کیا جائے گا، انہوں نے کہا کہ ضلع لاڑکانہ کے تھانوں میں کئی سالوں سے تعینات وہی ایس ایچ اوز چوروں اور ڈاکوؤں سے باخبر ہیں اور ہم اس معاملے پر بھی نظر رکھے ہوئے ہیں، انہوں نے کہا کہ لاڑکانہ کے بعد رتوڈیرو شہر میں امن و امان کی صورتحال کو مزید بہتر
بنانے کے لیے اے ایس پی تعینات کردیا گیا ہے، نوڈیرو اور لاڑکانہ میں قتل ہونے والے دو ہندو نوجوانوں کے قتل میں ملوث ملزمان کو بہت جلد گرفتار کرلیا جائے گا، انہوں نے کہا کہ سندھ حکومت بہت جلد لاڑکانہ میں ایک نئے جدید ترین اسپتال کی تعمیر کا آغاز کرے گی جس میں تمام ضروری سہولیات 24 گھنٹے دستیاب ہوں گی تاکہ ضلع لاڑکانہ اور دیگر شہروں سے آنے والے مریضوں کو علاج کی بہتر سہولیات میسر آسکیں، انہوں نے کہا کہ عرصہ دراز سے اغواء برائے تاوان کی وارداتوں میں کمی آئی ہے اور اس سال شاہراہوں پر چوری یا ڈکیتی کی کوئی واردات نہیں ہوئی اور نہ ہی کوئی بینک ڈکیتی ہوئی ہے، انہوں نے کہا کہ پولیس کی نفری 2740 سے بڑھا کر 4390 کردی گئی ہے، سرکاری پولیس گاڑیوں کی تعداد 25 سے بڑھا کر 120 کردی گئی ہے،
بجٹ میں مختص رقم میں 12 گنا اضافہ کیا گیا ہے، 9 نئے تھانے، 5 رپورٹنگ رومز اور ایک پولیس فیسلیٹیشن سینٹر قائم کیا گیا ہے، آئی ٹی سیکشنز اور سی آر اوز کا قیام عمل میں لایا گیا ہے، تھانہ سٹی کی سطح پر
مارکیٹ کو ماڈل میں تبدیل کرنے کا عمل شروع کیا گیا ہے، انہوں نے کہا کہ نئی اے ڈی پی میں ہٹری غلام شاہ، یونیورسٹی، باقرانی، ٹریفک برانچ اور ایس ڈی پی او آفس باقرانی کی تعمیر کے لیے فنڈز مختص کیے گئے ہیں، ضلع میں 11 نئے تھانوں کی مرمت اور تزئین و آرائش کا کام جلد شروع کر دیا جائے گا، اس کے علاوہ نوڈیرو سب ڈویژن کو ایک ماڈل لائن میں تبدیل کر دیا جائے گا۔
