سندھ میں آر اینڈ آر پالیسی کے نفاذ کی تربیت ورکشاپ کا آغاز
کراچی() سندھ میں ترقیاتی منصوبوں سے متعلقہ آباد کاری و بحالی (Resettlement and Rehablitation) آر اینڈ آر پالیسی کے مؤثر نفاذ کی چار روزہ تربیتی نشست کا آغاز جامعہ این ای ڈی کے سٹی کیمپس میں کیا گیا۔ یہ خصوصی تربیتی پروگرام پروجیکٹ کوآرڈینیشن اینڈ مانیٹرنگ یونٹ، پلاننگ اینڈ ڈویلپمنٹ ڈپارٹمنٹ، حکومت سندھ اور این ای ڈی یونیورسٹی کے سینٹر آف انوائرمنٹل اینڈ سوشل سسٹینیبلٹی کے باہمی اشتراک سے منعقد کیا جارہا ہے، جس میں ورلڈ بینک کی تکنیکی معاونت بھی شامل ہے۔ آر اینڈ آر ورکشاپ میں سندھ بھر سے 55 شرکا کو ابتدائی طور پرتربیت فراہم کی جارہی ہے۔ اس تربیتی ورکشاپ سے خطاب کرتے ہوۓ شیخ الجامعہ ڈاکٹرسروش لودھی کا کہنا تھا کہ سندھ میں ترقیاتی منصوبوں سے متاثرہ کمیونٹیز کے حقوق کے تحفظ کے لیے ایک اہم پیش رفت، آبادکاری اور بحالی آر اینڈ آر پالیسی کے مؤثر نفاذ کی چار روزہ تربیتی نشت سےمعاملات میں بہتری ممکن ہوسکے گی۔ اس موقعے پرانہوں نے بتایا کہ دورانِ تربیت فیلڈ کا دورہ بھی کروایا جاۓ گا جس سے معروضی حالات کو سمجھنا زیادہ آسان ہوگا۔ اس موقعے پر خطاب کرتے ہوۓ چیئرمین پلاننگ اینڈ ڈیولپمنٹ نجم شاہ کا کہنا تھا کہ مارچ 2023 میں اپنائی گئی یہ پالیسی پاکستان میں اپنی نوعیت کی پہلی پالیسی ہے، جس کا مقصد ترقیاتی منصوبوں میں متاثرہ افراد کے حقوق کی پاسداری کو یقینی بنانا ہے۔ لیکن بغیر اطلاق، پالیسی کاغذ کا پُرزہ ہے۔ انہوں نے زُور دیا کہ یہ تربیتی ورکشاپ علاقائی زبانوں میں کروائی جاۓ تاکہ مؤثر ہوسکے۔ اس تربیت میں مختلف محکموں اور انفراسٹرکچر ایجنسیوں کے قریباً 55 شرکاءحصّہ لے رہے ہیں، جو عملی مشقوں کے ذریعے آر اینڈ آر پالیسی کو سمجھنے اور اس پر عملدرآمد کے طریقہ کار سے واقفیت حاصل کررہے ہیں۔ یہ اقدام سندھ میں پائیدار ترقی کے سفر کو مزید مستحکم کرنے اور ترقیاتی منصوبوں کو سماجی اور ماحولیاتی طور پر ہم آہنگ بنانے کی جانب ایک مضبوط قدم ہوگی۔ اس موقعے پر ڈین ڈاکٹر نعمان احمد، پروجیکٹ کوآرڈینٹر پی سی ایم یو- ایس ایس یو پی اینڈ ڈی ڈیپارٹمنٹ حکومت سندھ کے نذیر احمد میمن، ورلڈبینک کی جانب سے سینئر سوشل ڈیولپمنٹ اسپشلسٹ عمران الحق سمیت ڈاکٹر محمد احمد ڈائریکٹر سینٹر آف انوائرمنٹل اینڈ سوشل سسٹینیبلٹی
نے بھی ورک شاپ کی افتتاحی تقریب سے خطاب کیا۔
