سول اسپتال کراچی میں کینسر کے 6 ہزار سے زائد کیسز رجسٹرڈ ہیں، ڈاکٹر خالد بخاری
کراچی: طبی ماہرین نے کہا ہے کہ سگریٹ،تمباکو نوشی، پان، چھالیہ، گٹکے، غیر متوازن غذا کے استعمال سے سر اور گردن کے کینسرکا خطرہ ہوتا ہے سر اور گردن کے سرطان سے متعلق آگاہی کی ضرورت ہے، بروقت تشخیص کے ذریعے اس مرض سے بچاؤ ممکن ہے،یہ باتیں انہوں نے ڈاؤ میڈیکل اور ڈاکٹر رتھ کے ایم فاؤ سول اسپتال کراچی کے اشتراک سے ‘سر اور گلے کے سرطان’ کے حوالے سے منعقدہ آگاہی مہم سے گفتگو کرتے ہوئے کہیں، آگاہی مہم کے افتتاح میں سول اسپتال کے
میڈیکل سپرنٹنڈنٹ ڈاکٹر خالد بخاری نے بطور مہمان خصوصی شرکت کی، اس موقع پر چیئرمین ای این ٹی ڈاکٹر صدف ضیا، ڈاکٹر عرفان احمد شیخ، ڈاکٹر سیدہ عظمیٰ نقوی اور ڈاکٹر دانش الراحم بھی موجود تھے، آگاہی مہم سے خطاب میں سول اسپتال کے میڈیکل سپرنٹنڈنٹ ڈاکٹر خالد بخاری نے سر اور گردن کے سرطان کی آگاہی مہم کی کوششوں کو سراہا، انہوں نے کہا کہ اس وقت سول اسپتال میں مختلف قسم کے کینسر کے 6 ہزار سے زائد کیسز رجسٹرڈ ہیں، انہوں نے کہا کہ سول اسپتال میں تشخیص اور علاج کی سہولت فراہم کی جاتی ہے، آگاہی مہم کے شرکا سے خطاب میں ڈاکٹر صدف ضیا نے بتایا کہ سر اور گردن کا سرطان سگریٹ،تمباکو نوشی، پان، چھالیہ، گٹکے، غیر متوازن غذا کے استعمال اور حفظان صحت کے اصولوں پر عمل نہ کرنے کی وجہ سے ہوتا ہے،
ڈاکٹر صدف ضیا نے کہا کہ سر اور گردن کے سرطان کی علامات میں اکثر ناک بہنا، سانس لینے، چبانے یا نگلنے میں پریشانی، آواز میں تبدیلی یا گلے کی سوزش، گردن یا منہ میں بے درد گانٹھ اور منہ میں بے درد سرخ یا سفید پیچ کی موجودگی شامل ہیں، ان کا کہنا تھا کہ سر اور گلے کے سرطان کے علاج کے لیے مرض کی نوعیت کی بنا پر ریڈی ایشن تھراپی، سرجری، کیموتھراپی اور امیونوتھراپی کی جاتی ہے،ڈاکٹر عرفان نے کہا کہ سر اور گردن کے سرطان سے بچا جاسکتا ہے، ان کا کہنا تھا کہ عوام میں اس کینسر کی وجوہات اور علامات سے متعلق آگاہی پیدا کرنے کی ضرورت ہے، انہوں نے کہا کہ بدقسمتی مریض اس وقت علاج کے لیے پہنچتا ہے جب کینسر پھیل چکا ہوتا ہے، انہوں نے کہا کہ خود آگاہی انتہائی اہم ہے کہ اپنے منہ کا معائنہ کرنا آئے تاکہ مرض کی بروقت تشخیص کی جاسکے، مہم کے دوران سول اسپتال کے ای این ٹی او پی ڈی میں آنے والے مریضوں کا تفصیلی معائنہ کیا گیا اور مریضوں کو سر اور گلے کے سرطان کی وجوہات سے متعلق بھی آگاہ کیا گیا۔
