رپورٹ رانا رضوان خاں فرینکفرٹ جرمنی۔
جرمنی میں 23 فروری کو ہونے والے عام انتخابات کیلئے سیاسی سرگرمیاں عروج پر ہیں تمام پارٹیاں اور امیدوار انتخابی مہم میں مصروف ہیں۔ فرینکفرٹ کے نواحی علاقہ ” ہاناؤ HANAU سے پاکستانی نژاد مہوش افتخار بھی انتخابات میں حصہ لے رہی ہیں جن کو “گرین پارٹی” کی طرف سے عام انتخابات کے لیے پارٹی ٹکٹ دے دیا گیا۔
مہوش کی پوزیشن بہت مستحکم ہے اور پوری پاکستانی کمیونٹی کے ساتھ ساتھ جرمن کمیونٹی کی بھی مکمل حمایت حاصل ہے۔ اسی سلسلے میں جرمنی کے شہر فرینکفرٹ میں ایک پروگرام منعقد کیا گیا جس میں پاکستان کی سیاسی، سماجی، مذہبی، کاروباری، صحافتی تنظمیوں کے ساتھ ساتھ پاکستانی کمیونٹی نے بھی کثیر تعداد میں شرکت کی۔
پروگرام کا انعقاد ” پاکستان اوورسیز الائنس فورم ” کے صدر اعجاز حسین پیارا کی طرف سے کیا گیا۔ پروگرام کا آغاز تلاوت قرآن پاک سے کیا گیا۔ پھر پیغمبر اسلام حضرت محمد ﷺ کی خدمت میں قصیدہ بردہ شریف پیش کیا گیا۔
پروگرام کی نظامت کے فرائض ڈاکٹر تسنیم سعید نے نہایت خوش اسلوبی سے ادا کیے۔ قاضی حبیب، انصر بٹ، عمران ضیاء جنجوعہ ، شفیق مراد، شاہد مقبول ، تصور حسین اور حامد شاہ سمیت کمیونٹی کے سرکردہ افراد نے اپنے خیالات کا اظہار کیا اور مہوش افتخار کو ٹکٹ ملنے پر مبارکباد دی۔
مہوش افتخار کا کہنا ہے کہ میں انتخابات میں کامیاب ہو کر جرمنی میں مقیم پاکستانیوں کی آواز بلند کروں گی اور اُنکے حقوق کے لیے ہر ممکن کام کرونگی۔
پروگرام کے آخر میں اعجاز حسین پیارا کی طرف سے مہمانوں کا شکریہ ادا کیا گیا اور اُنکی ریفریشمنٹ سے تواضح کی گئی۔
