لزبن(پرتگال) — تحریک منہاج القرآن امٹرنیشنل پرتگال کے زیرِ اہتمام لزبن کے مقامی کمیونٹی ہال میں سیرت النبیﷺ کانفرنس کا انعقاد کیا گیا۔ کانفرنس میں صدر منہاج یورپین کونسل بلال اپل، فیض عالم قادری، صدر منہاج القرآن پرتگال کاشف نذیر، امجد محمود، شاہ رخ سہیل، غلام دستگیر، سفیان یوسف، بابر نواز، فیصل اکرم، غضنفر نذیر، عمر مصطفی، عبدالباسط، ابوبکر مصطفی، عمران منور، قاسم علی صابر اور حمزہ امجد سمیت منہاج القرآن پرتگال کے ذمہ داران، عہدیداران اور کارکنان کے ساتھ ساتھ مقامی کمیونٹی کی معزز شخصیات، خواتین اور نوجوانوں نے بھی بھرپور شرکت کی، جس سے یہ کانفرنس ایک روحانی اور علمی اجتماع کی شکل اختیار کر گئی۔
کانفرنس کے مہمانِ خصوصی چئیرمین سپریم کونسل منہاج القرآن انٹرنیشنل ڈاکٹر حسن محی الدین قادری نے اپنے خطاب میں اسلام کو امن، محبت، رحمت اور انسانی فلاح کا عالمگیر دین قرار دیتے ہوئے فرمایا کہ اسلام کی بنیادی تعلیمات انہی اصولوں پر استوار ہیں، جو اسے پوری انسانیت کے لیے ہدایت اور رحمت کا سرچشمہ بناتی ہیں۔
آپ نے نبی کریمﷺ کی بے پایاں رحمت پر روشنی ڈالتے ہوئے فرمایا:
“نبی اکرمﷺ کو اللہ تعالیٰ نے تمام جہانوں اور تمام مخلوقات کے لیے رحمت بنا کر بھیجا۔ آپﷺ انسانیت کے دکھوں اور مشکلات کو گہرائی سے محسوس فرماتے اور ہر فرد کی بھلائی کے لیے کوشش کرتے، چاہے وہ ایمان لانے والا ہو یا نہ ہو۔ لیکن اہلِ ایمان کے لیے آپﷺ کی رحمت بے حد و حساب ہے۔”
ڈاکٹر حسن قادری نے مزید کہا کہ سیرتِ طیبہﷺ کا مطالعہ ہمیں ایسے بے شمار واقعات فراہم کرتا ہے جو آپﷺ کی وسیع رحمت اور شفقت کو واضح کرتے ہیں، لہذا ہمیں امن، رواداری اور بھائی چارے کے فروغ کے لیے آپﷺ کی سیرت کو اپنانے کی ضرورت ہے۔
آپ نے منہاج القرآن پرتگال کو اپنی اس پہلی کانفرنس کے کامیاب انعقاد پر دلی مبارکباد پیش کی اور اسے امن اور وحدت کے پیغام کو عام کرنے میں ایک اہم سنگ میل قرار دیا۔
کانفرنس کے اختتام پر صدر منہاج القرآن انٹرنیشنل پرتگال محمد کاشف نذیر نے تمام معزز مہمانوں اور شرکاءِ کا شکریہ ادا کیا، اور بالخصوص ڈاکٹر حسن محی الدین قادری کی خصوصی شرکت پر ان کا تہہ دل سے شکریہ ادا کیا، اور ان کی شرکت کو کانفرنس کی کامیابی کا اہم پہلو قرار دیتے ہوئے کہا کہ یہ کانفرنس نبی اکرمﷺ کی تعلیمات کی روشنی میں محبت، رواداری، اور عالمی امن کے فروغ کے لیے ایک مؤثر پلیٹ فارم ثابت ہوئی۔
