کراچی: پراجیکٹ ڈائریکٹر سالڈ ویسٹ ایمرجنسی اینڈ ایفیشینسی پراجیکٹ (SWEEP) حکومت سندھ، دادلو زھرانی نے نیشنل ڈس ایبلٹی اینڈ ڈیولپمنٹ فورم (NDF) کے تحت جاری روزگار وسائل منصوبہ (LRP) کے تربیتی ورکشاپ کا دورہ کیا۔ یہ منصوبہ جام چکرو لینڈ فل سائٹ، ضلع ویسٹ کراچی میں فضلہ چننے والوں کی تربیت اور انہیں روزگار کے متبادل ذرائع فراہم کرنے کے لیے بنایا گیا ہے، جسے SWEEP، حکومت سندھ، اور ورلڈ بینک کی مالی معاونت حاصل ہے۔
دادلو زھرانی نے ووکیشنل ٹریننگ انسٹی ٹیوٹ (VTI) حیدری، نارتھ ناظم آباد کا دورہ کیا، جہاں این ڈی ایف کے صدر عابد لاشاری نے انہیں منصوبے کی پیش رفت کے بارے میں تفصیلی بریفنگ دی۔ انہوں نے زیر تربیت و اساتذہ سے ملاقات کی اور تربیت کی سہولیات اور اس کے اثرات کا جائزہ لیا۔ دادلو زہرانی نے این ڈی ایف کی ان کوششوں کو سراہا جو وہ فضلہ چننے والوں کو معاشرے کا مفید شہری بنانے کے لیے کر رہا ہے۔ اس منصوبہ کے ذریعے انہیں ہنر مند روزگار
کے مواقع فراہم کیے جا رہے ہیں تاکہ وہ فضلہ چننے کی بجائے باعزت روزگار اور کاروبار کی طرف راغب ہوں۔ عابد لاشاری نے این ڈی ایف کے اس عزم کو دہرایا کہ وہ فضلہ چننے والوں کو خود کفیل بنانے، ان کی زندگیوں میں بہتری لانے اور انہیں ہنر مند لیبر مارکیٹ میں شامل کرنے کے لیے کوشاں ہے۔ انہوں نے اس ویژن پر زور دیا کہ انہیں ایسا کاروبار کرنے کے قابل بنایا جائے جس سے وہ معاشی طور پر مستحکم ہو سکیں اور معاشرے میں عزت کے ساتھ زندگی گزار سکیں۔
دورے کے دوران احمد علی سومرو، ڈپٹی پراجیکٹ ڈائریکٹر SWEEP، نواز جانوری (SWEEP)، عبدالوحید ارباب، (ڈپٹی پراجیکٹ لیڈ NDF)، اور حامد علی انصاری، (پرنسپل VTI حیدری) بھی موجود تھے۔
