تعلیم پر سرمایہ کاری کئے بغیر ہم اپنے اہداف حاصل نہیں کرسکتے۔ڈاکٹر خالد عراقی
جامعہ کراچی کے وائس چانسلر پروفیسرڈاکٹر خالد محمودعراقی نے کہا کہ ترقی کے لئے نالج بیسڈ سوسائٹی اور نالج بیسڈاکانومی ناگزیر ہے،قومیں مشکلات سے سیکھتی ہیں اورجاپان،جرمنی، چین اس کی واضح مثالیں ہیں۔پاکستان کا سب سے بڑا مسئلہ یہ ہے کہ ریاست کسی قسم کی ذمہ داری لینے کو تیار نہیں،ان کے حصے کا کام بھی فلاحی ادارے کرتے نظرآتے ہیں جو لمحہ فکریہ ہے۔پوری دنیا تدریس وتحقیق میں صرف ہونے والی رقم کو سرمایہ کاری جبکہ پاکستان میں اس کو بوجھ سمجاجاتاہے،جب تک تعلیم پر سرمایہ کاری نہیں ہوگی ہم ترقی یافتہ ممالک میں شامل نہیں ہوسکتے،کیونکہ تعلیم ہی آگے بڑھنے کا واحدراستہ ہے۔آج وہ ہی ممالک ترقی کررہے ہیں جنہوں نے سمجھ لیا ہے کہ ان کی اصل دولت ان کی افرادی قوت میں پوشیدہ ہے اور سب سے زیادہ ترجیح اپنی منصوبہ بندی میں تعلیم،سائنس وٹیکنالوجی اور جدت طرازی کو دے رہے ہیں۔ان خیالات کا اظہارانہو ں نے شعبہ شماریات جامعہ کراچی میں اَپ گریڈڈکمپیوٹرلیب کی افتتاحی تقریب سے خطاب کرتے ہوئے کیا۔
رئیس کلیہ علوم جامعہ کراچی پروفیسرڈاکٹرمسرت جہاں یوسف نے کہا کہ موجودہ دورسائنس وٹیکنالوجی کا ہے اور ٹیکنالوجی ہرشعبہ ہائے زندگی کی ضرورت بن چکی ہے۔انہوں نے کہا کہ جدید تقاضوں سے ہم آہنگ کمپیوٹرز صرف شعبہ شماریات نہیں بلکہ تمام شعبہ جات کے ضروری ہیں۔انہوں نے مظہر الحق کی جانب سے شعبہ شماریات کو فراہم کئے جانے والے کمپیوٹرز کو ایک بہترین سرمایہ قراردیتے ہوئے کہا کہ اصل سرمایہ کاری یہ ہے کہ ہم اپنی نوجوان نسل کو عصرحاضر کے جدید تقاضوں سے ہم آہنگ کریں۔
شعبہ شماریات جامعہ کراچی سے 1973 ء میں فارغ التحصیل ہونے والے مظہرالحق نے کہا کہ شعبہ شماریات سے فارغ التحصیل طلبہ نہ صرف فارایسٹ ممالک بلکہ امریکہ اور مختلف یورپی ممالک میں جامعہ کراچی اور پاکستان کا نام روشن کررہے ہیں،اس جامعہ نے ہمیں بہت کچھ دیا ہے،ہم سب کو بھی اپنی استطاعت کے مطابق اس کو لوٹانے کے لئے کوششیں کرنی چاہیئے اور شعبہ ہذا کوکمپیوٹر زفراہم کرنا میری طرف سے ایک چھوٹی سی کوشش ہے۔
انچارج شعبہ شماریات ڈاکٹر رافعہ شفیع نے کلمات تشکر اداکرتے ہوئے کہا کہ مجھے امید ہے کہ اس بہترین تحفہ سے شعبہ ہذاکے طلباوطالبات کو جدید ٹیکنالوجی سے ہم آہنگ ہونے میں بہت مددملے گی۔
