کراچی (پریس ریلیز ) آل پاکستان متحدہ ٹرانسپورٹر فیڈریشن کے صدر اسرار احمد شنواری نے موچکو کی حدود میں ڈرائیورز پر تشدد اور جھوٹی ایف آئی آر درج کرانے کی سختی سے مذمت کرتے ہوئے ڈی آئی جی ساوتھ سے اپیل کی ہے کہ وہ موچکو پولیس کے اس ظلم اور پر تشدد کارروائیوں سے نجات دلائیں بصورت دیگر ہم بلاول ہاوس چورنگی اور کراچی پریس کلب کے باہر احتجاجی مظاہرہ کریں گے۔ اسرار احمد شینواری نے ڈی آئی جی ساوتھ کو اپنے ایک خط میں لکھا کہ ایس ایس پی کیماڑی فیضان علی کو کئی بار فون پر شکایت کی لیکن کوئی مثبت جواب نہیں ملا۔ انھوں نے بتایا کہ ایک پولیس اہلکار نے نام نہ بتانے کی شرط پر بتایا کہ دو شخص اسد اور فخر دونوں ایس ایس پی کے بندے ہیں۔ یہ تین جگہ پر کھڑے ہوتے ہیں اور ڈرائیورز کو مارپیٹ کر انھیں بے دردی سے لوٹ رہے ہیں۔ انھوں نے ڈی آئی جی سے اپیل کی ہے کہ وہ موچکہ تھانے کی حدود میں ہمارے غریب ڈرائیوروں کو تحفظ فراہم کریں اور یہاں کے پولیس افسران کو ہٹایا جائے ۔
