لاہور 21 دسمبر : فاؤنٹین ہاؤس، انسٹی ٹیوٹ آف مینٹل ہیلتھ اور الجنہ گروپ آف آرگنائزیشن نے باہمی تعاون سے کرسمس کی مناسبت سے مسیحی خواجہ سراؤں کے لیے ایک پروقار تقریب کا انعقاد کیا۔تقریب میں صوبائی وزیر برائے اقلیتی امور، سردار رمیش سنگھ اروڑہ نے بطور مہمان خصوصی شرکت کی اور مسیحی خواجہ سراؤں میں تحائف اور نقدی تقسیم کی۔ اس موقع پر جنرل مینیجر فیسز پاکستان ایوب اعجاز اور خواجہ سراء کمیونٹی کی ایک بڑی تعداد موجود تھی ۔
خواجہ سراء کمیونٹی کی نمائندگی کرتے ہوئے اشمال چوہدری کا کہنا تھا کہ آج کی تقریب کا مقصد مسیحی خواجہ سراؤں کے حق میں آواز بلند کرنا اور انہیں معاشرتی سطح پر تسلیم کروانے کے لیے ملکر کاوش کرنا ہے ۔ فاؤنٹین ہاؤس اور الجنہ گروپ آف آرگنائزیشن کی جانب سے کیے گئے اس اقدام سے خواجہ سراء کمیونٹی کو یہ پیغام دینا چاہتے ہیں کہ ان کی فلاح و بہبود اور ترقی کے لیے حکومت اور سول سوسائٹی مکمل تعاون فراہم کرنے کے لیے تیار ہیں۔ تقریب سے خطاب کرتے ہوئے صوبائی وزیرنے کہا کہ خواجہ سراء کمیونٹی ہمارے معاشرے کا ایک اہم حصہ ہیں اور ان کی زندگی میں درپیش مشکلات کو سمجھتے ہوئے ان کے لیے مختلف اقدامات کیے گئے ہیں۔ 
کوشش ہے کہ اس کمیونٹی کو ان کا جائز مقام دلوایا جائے اور انہیں معاشرتی دھارے میں شامل کیا جائے۔انہوں نے مزید کہا کہ مسیحی خواجہ سراؤں کو کرسمس گرانٹ میں شامل کیا جائے گا اور وزیر اعلیٰ پنجاب کی جانب سے گرانٹ فراہم کی جائے گی۔ اس کے علاوہ، 50 ہزار اقلیتی خاندانوں کے لیے اقلیتی کارڈز جاری کیے جا رہے ہیں، ان میں بھی خواجہ سراء کمیونٹی کو شامل کریں گے۔ انہوں نے اس بات پر زور دیا کہ خواجہ سراء کمیونٹی کے مسائل کو اسمبلی میں اُٹھایا جائے گا اور ان کے لیے ہنر مندی کے پروگرام شروع کیے جائیں گے تاکہ وہ معاشرتی ترقی میں حصہ لے سکیں۔ صوبائی وزیر نے مزید کہا کہ خواجہ سراء کمیونٹی کے ارکان کو ہنر مند بنا کر انہیں معاشے کا ایک اہم حصہ بنائیں گے۔ ان کی محنت اور جذبے کو ہم سلام پیش کرتے ہیں۔صوبائی وزیر نے کہا کہ دکھی انسانیت کی خدمت ہمارا فرض ہے اور ہم خواجہ سراء کمیونٹی کو باوقار زندگی فراہم کرنے کے لیے ہر ممکن اقدامات کریں گے۔
ایم پی اے رخسانہ کوثر نے بھی اپنی تقریر میں خواجہ سراء کمیونٹی کی حمایت کا اظہار کیا اور کہا کہ ہم اسمبلی میں ان کے حقوق کے لیے آواز اُٹھائیں گے اور ان کی فلاح و بہبود کے لیے کام کریں گے۔ صوبائ وزیر نے فاؤنٹین ہاؤس کا دورہ بھی کیا جہاں مختلف اہم سینٹرز کا جائزہ لیا گیا۔ فاؤنٹین ہاؤس کی انتظامیہ نے خواجہ سراء کمیونٹی کے لیے فراہم کی جانے والی خدمات کے بارے میں صوبائی وزیر کو آگاہ کیا، جن میں ذہنی صحت کی بحالی، تعلیم اور پیشہ ورانہ تربیت شامل تھیں۔ صوبائی وزیر نے فاؤنٹین ہاؤس کی کاوشوں کو سراہا اور کہا کہ خواجہ سراء کمیونٹی کے لیے اس قسم کے اقدامات ہمارے معاشرے کے لیے ضروری ہیں۔ تقریب کے اختتام پر صوبائی وزیر نے خواجہ سراء کمیونٹی اور دیگر کے ہمراہ کرسمس کیک بھی کاٹا۔
