کراچی
مور خہ18 دسمبر 2024
صوبائی وزیر مکیش کمار چاولہ کی گاڑیوں کے نئے سیکیورٹی فیچرڈ اسمارٹ کارڈز اور نئی نمبر پلیٹس کے اجراء کا حکم
محکمہ ایکسائز، ٹیکسیشن اینڈ نارکوٹکس کنٹرول سندھ نے نوٹیفیکیشن جاری کردیے
عوام 3 اپریل 2025 تک نئے سیکیورٹی فیچرڈ اسمارٹ کارڈز اور نمبر پلیٹس بنوالیں، مجوزہ تاریخ کے بعد کوئی رعایت نہیں دی جائے گی، مکیش کمار چاولہ
کراچی 18 دسمبر ۔صوبائی وزیر ایکسائز، ٹیکسیشن اینڈ نارکوٹکس کنٹرول سندھ مکیش کمار چاولہ نے گاڑیوں کے نئے سیکیورٹی فیچرڈ اسمارٹ کارڈز اور نئی نمبر پلیٹس کے اجراء کا حکم دیدیا ہے۔ صوبائی وزیر مکیش کمار چاولہ کی ہدایت پر محکمہ ایکسائز، ٹیکسیشن اینڈ نارکوٹکس کنٹرول سندھ نے دو علیحدہ نوٹیفیکیشنز جاری کرتے ہوئے عوام کو مطلع کیا گیا ہے کہ وہ 3 اپریل 2025 تک نئے سیکیورٹی فیچرڈ اسمارٹ کارڈز اور نمبر پلیٹس بنوالیں، مجوزہ تاریخ کے بعد کوئی رعایت نہیں دی جائے گی۔ نوٹیفیکیشن کے مطابق نئے سیکیورٹی فیچرڈ اسمارٹ کارڈز کی بدولت گاڑیوں کی خرید و فروخت میں فراڈ و ٹیمپرنگ سے بچاؤ ممکن ہوسکے گا۔ دوسرے نوٹیفیکیشن میں عوام کو آگاہ کیا گیا ہے کہ آئندہ تمام نجی گاڑیوں کی نمبر پلیٹس سفید رنگ اور سندھی اجرک کے ڈیزائن کی ہوں گی جبکہ کمرشل گاڑیوں کی نمبر پلیٹس پیلے رنگ اور سندھی اجرک کے ڈیزائن کی ہوں گی۔ 3 اپریل 2025ء کے بعد سے تمام نجی گاڑیوں کی پیلی نمبر پلیٹس اور کمرشل گاڑیوں کی کالی نمبر پلیٹس ناقابل قبول ہوں گی۔ نمبر پلیٹس کی تبدیلی کا فیصلہ گاڑیوں کے حفاظتی اقدامات اور یکساں شناخت کے لیے کیا گیا ہے۔ تمام گاڑی مالکان کسی بھی پریشانی سے بچنے کے لیے 3 اپریل سے قبل محکمہ ایکسائز کے کسی بھی موٹر رجسٹریشن اتھارٹی سے اپنی رجسٹریشن بک اور نمبر پلیٹس کی تبدیلی سے متعلق رجوع کرسکتے ہیں۔
کراچی
مور خہ18 دسمبر 2024
سندھ میں غربت کے خاتمے کے لیے مشترکہ کوششیں: STEVTA اور BISP کا تعاون پر تبادلہ خیال
کراچی،18 دسمبر ۔ وزیر اعلیٰ سندھ کے معاون خصوصی/چیئرمین سندھ ٹیکنیکل ایجوکیشن اینڈ ووکیشنل ٹریننگ اتھارٹی (STEVTA) جنید بلند نے بینظیر انکم سپورٹ پروگرام (BISP) سندھ کے ڈائریکٹر جنرل ذوالفقار شیخ سے مشترکہ منصوبوں پر بات چیت کرنے کے لیے اپنے دفتر میں ایک میٹنگ کی، جس کا مقصد عوام کو ملنے والی مالی امداد کے ساتھ پیشہ ورانہ تربیت کو یکجا کرنا تھا۔ وزیر اعلیٰ سندھ کے معاون خصوصی /چیئرمین STEVTA جنید بلند نے کہا کہ غربت کا خاتمہ پی پی پی کے منشور میں شامل ہے، جس پہ بلاول بھٹو سمیت پارٹی کی قیادت عمل کرتے ہوئے سندھ حکومت کے ذریعے نئی اسکیمیں اور پراجیکٹس متعارف کروا رہی ہے۔ “STEVTA اور BISP کے درمیان یہ ملاقات سندھ میں غربت کے خاتمے کی طرف قدم بڑھانے کے لیے ضروری تھی، تاکہ بی آئی ایس پی میں شمار افراد خصوصاً خواتین، کو بااختیار بنایا جا سکے اور انہیں پائیدار روزگار کے مواقع فراہم کیے جا سکیں۔ انہوں نے کہا کہ بی آئی ایس پی میں شامل افراد کو ایسی مہارتیں فراہم کریں جو انہیں روزگار کے حوالے سے ایک کامیاب فرد بنائیں، اسٹیوٹا اور بی آئی ایس پی کی مشترکہ کوششوں سے ہمیں لوگوں کی زندگیوں میں بہتری لانے کی توقع ہے۔”انہوں نے مزید کہا کہ بی آئی ایس پی سے فائدہ اٹھانے والوں کی اکثریت خواتین پر مشتمل ہے، جن کو بااختیار بنانے پر خاص توجہ دینے کی ضرورت ہے۔ خاص طور پر IT جیسے شعبے میں خواتین کی شرکت کم ہے، لیکن اس شعبے میں ترقی کے امکانات زیادہ ہیں۔ بینظیر انکم سپورٹ پروگرام سندھ کے ڈائریکٹر جنرل ذوالفقار شیخ نے کہا کہ اگرچہ مالی امداد اہم تو ہے پر یہ غربت کا خاتمہ نہیں کر سکتی۔ عوام کو غربت سے نکالنے کے لیے ان کی مالی مدد کے ساتھ پیشہ ورانہ صلاحیتوں کو بھی بہتر بنانے کی ضرورت ہے۔ تاکہ اس سے فائدہ اٹھانے والوں کے لیے طویل مدتی روزگار حاصل کرنے یا اپنا کاروبار شروع کرنے کے امکانات بڑھ سکیں۔
کراچی
مور خہ18 دسمبر 2024
پریس ریلیز
کراچی 18دسمبر ۔ڈائریکٹرجنرل سندھ بلڈنگ کنٹرول اتھارٹی عبدالرشید سولنگی کی ہدایات پر ڈیمالیشن اسکواڈ نے شہر کے مختلف علاقوں میں اضافی منزلوں،پورشنزاوراستعمال اراضی کی خلاف ورزی سمیت دیگرغیرقانونی تعمیرات کے خلاف کارروائی کرتے ہوئے انہیں منہدم و سربمہرکردیا۔تفصیلات کے مطابق ڈیمالیشن اسکواڈ کی ایک ٹیم نے ڈسٹرکٹ ایسٹ کے علاقے پی ای سی ایچ ایس میں پلاٹ نمبر 266-L، بلاک 6، پرگراؤنڈفلور کی دیواروں،آرسی سی کالمزاور چھت اورپلاٹ نمبر267-M، بلاک 6، پر عقبی جانب لازمی کھلی جگہ پر تعمیرات کو منہدم کردیا جبکہ پی ایس سی ایچ ایس میں ہی پلاٹ نمبر 159-R، بلاک 3، ڈیائنرمال طارق روڈ،سپرٹیکسٹائل پلازہ،طارق روڈ کو سربمہرکردیا گیا دیگرمختلف علاقوں میں ہونے والی کارروائی میں پلاٹ نمبر64-B، سولجربازار پر تیسری منزل کی پارٹیشن دیواروں،پلاٹ نمبر 710/3، فاطمہ جناح کالونی پر دوسری منزل کی پارٹیشن دیواروں اور آرسی سی چھت،گلشن اقبال اسکیم 24،میں پلاٹ نمبر A-22،بلاک 11،پر گراؤنڈاور پہلی منزل کی مکمل تعمیرات کو منہدم کردیا اورپلاٹ نمبر C-46، بلاک 13-D، پربغیراجازت اندورنی تعمیراتی ردو بدل اور لازمی کھلی جگہ پر تعمیرات کومسمار اورپلاٹ نمبرB-15، بلاک 01، چوتھی منزل کی پارٹیشن دیواروں کو منہدم کردیاجبکہ پلاٹ نمبر ST-11، FL-08، بلاک 02، پر واقع صائمہ روائل ریزیڈینسی کی بیسمنٹ کو سربمہرکردیاگیا۔ڈسڑکٹ ایسٹ کے دیگرعلاقوں میں ہونے والی کارروائی میں پلاٹ نمبر L-2676،میٹروول تھرڈپر دوسری منزل کی آرسی سی چھت اور پارٹیشن دیواروں منظورکالونی میں پلاٹ نمبر (17) / (02)، اسٹریٹ نمبر 9سیکٹر D، پر عقبی جانب دیواروں اور چھت،جبکہ معززعدالت کے حکم کی تعمیل میں پلاٹ نمبر 74,A/1،اوورسیزسی ایچ ایس بلاک 7&8، پر تیسری منزل پر 02کمروں،دوسری منزل کی چھت جزوی طور پر جبکہ گراؤنڈاورپہلی منزل کی پارٹیشن دیواروں کو منہدم کردیاگیا۔ علاوہ ازیں ڈسٹرکٹ ساؤتھ کے علاقے لیاری میں ڈیمالیشن اسکواڈ نے معززعدالت کے دو مختلف احکامات کی تعمیل میں پلاٹ نمبر52/3، اسٹریٹ نمبر9-A، بی روڈ یوسی 02، بہارکالونی پر دوسری منزل کی آرسی سی چھت،شیٹرنگ اوردیواروں کومنہدم کرتے ہوئے سربمہرکردیا جبکہ پلاٹ نمبر90/7، اسٹریٹ نمبرG-10، نورانی مسجد والی روڈ،یوسی 01، آگرہ تاج کالونی پر گراؤنڈفلور کی آرسی سی بنیادوں اوردیواروں کومسمار کردیا گیا،دیگرکارروائی میں پلاٹ واقع نزد جونامسجد آگرہ تاج پر غیرقانونی تعمیرات کو سربمہرکردیاگیا۔دریں اثنا ڈیمالیشن ٹیم نے ڈسٹرکٹ ویسٹ کے علاقے اورنگی ٹاؤن میں پلاٹ نمبر944، سیکٹر10-L، اورنگی پر تیسری منزل کی تعمیرات کو منہدم اور پلاٹ نمبرLS-2 تاLS-07تک غیرقانونی تعمیرات کے خلاف انہدامی عمل کے دوران مجمع کی جانب سے نقص امن کے پیش نظر تعمیرات کو سربمہرکردیاجبکہ ایک اور ٹیم نے ڈسٹرکٹ کورنگی میں پلاٹ نمبر S2-849، سعودآباد ملیر پر گراؤنڈ اور پہلی منزل کی مکمل تعمیرات کو منہدم کردیاگیا۔ غیرقانونی تعمیرات کے خلاف مذکورہ بالاکارروائی متعلقہ ڈپٹی واسسٹنٹ ڈائریکٹرز اور ڈیمالیشن آفیسرز کی زیرنگرانی عمل میں لائی گئی جبکہ اس دوران امن و امان کی صورتحال کو قابومیں رکھنے کے لئے ایس بی سی اے پولیس فورس اور مقامی پولیس نفری ان کے ہمراہ وہاں موجود تھی۔
