16 دسمبر 2024
راولپنڈی
راولپنڈی ریسٹورنٹ کیٹررز سویٹس اینڈ بیکرز ایسوسی ایشن کے صدر محمد فاروق چوہدری نے وزیراعظم سے 2024 میں منقطع ہونے والے سوئی گیس کنکشنز کی تفصیلات طلب کرنے کا مطالبہ کیا اور کہا کہ سوئی گیس کی قلت اور قیمتوں میں بے تحاشہ اضافے کے باعث کمرشل صارفین سوئی گیس کے کنکشن منقطع کرنے پر مجبور ہیں۔وزیر پیٹرولیم، چیئرمین اوگرا، اور ایم ڈی سوئی گیس کو متعدد بار صارفین کے مسائل سے آگاہ کیا گیا لیکن کوئی شنوائی نہیں ہوئی۔فوڈ بزنس سے منسلک تاجر برادری اوگرا کے منتظمین سے پرزور اپیل کرتے ہیں کہ وہ ایل پی جی کی بلیک مارکیٹنگ، ناقص کوالٹی ایل پی جی گیس، سوئی گیس سلنڈر کے معیار اور مارکیٹ میں معیاری ریگولیٹر پائپ کی فراہمی کو یقینی بنائیں۔
راولپنڈی ریسٹورنٹ کیٹررز سویٹس اینڈ بیکرز ایسوسی ایشن کے صدر محمد فاروق چوہدری نے اپنے اہم بیان میں کہا کہ جنوری 2024 سے جولائی 2024 تک کمرشل صارفین سے ہر ماہ سیکیورٹی کی مد میں بھاری رقوم وصول کی گئیں،دوسری جانب سوئی گیس کی قلت اور قیمتوں میں اضافے کے باعث رواں سال ہزاروں کمرشل صارفین اپنے سوئی گیس کے کنکشن منقطع کرنے پر مجبور ہوگئے۔جس سے فوڈ کے کاروبار سے وابستہ لاکھوں افراد بے روزگار ہو گئے۔ان کا مزید کہنا تھا کہ اس حوالے سے وزیر پیٹرولیم، چیئرمین اوگرا، ایم ڈی سوئی گیس کو متعدد بار نہ صرف آگاہ کیا گیا، بلکہ باضابطہ تحریری درخواستیں بھی دیں لیکن کوئی شنوائی نہیں ہوئی۔انہوں نے وزیر اعظم شہباز شریف سے مطالبہ کیا کہ محکمہ سوئی گیس سے رواں سال کے سوئی گیس کے منقطع کنکشنز کی تفصیلات منظر عام پر لائی جائیں،تاکہ اندازہ لگایا جا سکے کہ سوئی گیس کی قلت کے باعث لاکھوں لوگوں کو کتنی پریشانی کا سامنا کرنا پڑا۔انہوں نے مزید کہا کہ اوگرا ایل پی جی کی بلیک مارکیٹنگ کے خاتمے، غیر معیاری ایل پی جی گیس کی روک تھام، سلنڈرز کے معیار کو چیک کرنے اور مارکیٹ میں معیاری ریگولیٹر پائپوں کی فراہمی کو یقینی بنانے کے لیے اقدامات کرے تاکہ روزانہ ہونے والے حادثات پر قابو پایا جا سکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
