چڑیا گھر کے شائقین کے لیے افسوسناک خبر…..کراچی: سفاری پارک میں موجود ہتھنی سونیا مر گئی
توقع کی جارہی تھی کہ مدھوبالا (مادہ ہاتھی) کے شفٹ ہونے کے بعد سفاری پارک کراچی میں خوشیاں بڑھیں گی اور کل 3 ہاتھی خوش ہوں گے لیکن ایک مادہ ہاتھی سونیا 24 سال کی عمر میں سفاری پارک کراچی میں دل کا دورہ پڑنے سے چل بسی۔
اس حوالے سے سفاری پارک کے ذرائع کا کہنا ہے کہ ہتھنی سونیا کی موت گزشتہ رات ہوئی، صبح عملہ پہنچا تو ہتھنی کو مردہ پایا۔
سفاری پارک کے ذرائع کا کہنا ہے کہ ہتھنی سونیا کی عمر 22 سے 23 سال تھی۔
ذرائع نے بتایا کہ ہتھنی سونیا اور ملکہ پہلے سے سفاری پارک میں تھیں۔
ہتھنی مدھوبالا کی سفاری پارک منتقلی کیلئے گرین سگنل مل گیا
چند روز قبل چڑیا گھر سے ہتھنی مدھو بالا کو سفاری پارک منتقل کیا گیا تھا۔
سفاری پارک کے ذرائع نے بتایا کہ ہتھنی سونیا کے مرنے کے بعد اب سفاری پارک میں 2 ہتھنیاں ہیں۔
جیو نیوز سے گفتگو کرتے ہوئے ڈائریکٹر سفاری پارک امجد زیدی نے کہا ہے کہ ہتھنی سونیا کی موت گزشتہ رات اچانک ہوئی۔
انہوں نے بتایا کہ ابتدائی طور پر ہتھنی کی موت کا سبب ہارٹ اٹیک لگ رہا ہے، پوسٹ مارٹم کے بعد ہتھنی کی موت کی وجہ معلوم ہو گی۔
