ڈائریکٹر جنرل نرسنگ پنجاب طاہرہ صغیر کی سربراہی میں پاکستان نرسنگ کونسل کے وفد نے امیر الدین نرسنگ میڈیکل کالج و لاہورجنرل ہسپتال مڈ وائفری کا دورہ کیا اور پنجاب حکومت کی جانب سے پہلی مرتبہ بی ایس سی نرسنگ کی ایوننگ کلاسز کے الحاق کیلئے سہولیات بارے تفصیلی جائزہ لیا۔وفد کے ارکان میں رحمت اللہ، مسز ساجد ہ،ارشاد خان اور مس رانی شامل تھے جبکہ نرسنگ کالج کی پرنسپل روبینہ انعام نے فیکلٹی ممبران کے ہمراہ وفد کے ارکان کا استقبال کیا اور انہیں کالج میں خوش آمدید کہا۔ پاکستان نرسنگ کونسل کے وفد نے طالبات سے تعلیم و تربیت اور نرسنگ کلاسز کے بارے میں دریافت کیا۔
نرسنگ کالج کی پرنسپل روبینہ انعام نے پاکستان نرسنگ کونسل کے وفد کو بریفنگ دیتے ہوئے بتایا کہ1962میں قائم ہونے والے نرسنگ انسٹی ٹیوٹ سے اب تک بڑی تعداد میں نرسیں فارغ التحصیل ہو کر اندرون وبیرون ممالک پیشہ ورانہ خدمات انجام دے رہی ہیں اور درس و تدریس سے وابستہ ہیں اورادارے کا نام روشن کر رہی ہیں۔ انہوں نے بتایا کہ ریگولر کلاسز میں سٹوڈنٹس کو موسمی تبدیلیوں کے حوالے سے بھی تفصیلی آگاہی فراہم کی جاتی ہے۔روبینہ انعام نے بتایا کہ پرنسپل پی جی ایم آئی پروفیسر ڈاکٹر محمد الفرید ظفر نرسنگ طالبات کی تعلیم و تربیت اور بنیادی ضروریات کی سہولیات میں ذاتی دلچسپی لیتے ہیں تاکہ دور دراز کے علاقوں سے آنے والی طالبات کو کسی مشکلات کا سامنا نہ کرنا پڑے۔ وفد نے ارکان نے بہترین سہولیات کی فراہمی پر اطمینان کا اظہار کیا۔
