لاہور : 30 نومبر 2024
وزیر اعظم محمد شہباز شریف اور ملائیشیاء کے وزیر اعظم داتو سری انور ابراہیم کے درمیان ٹیلیفونک رابطہ
وزیر اعظم محمد شہباز شریف نے اور ملائیشیاء کے وزیر اعظم داتو سری انور ابراہیم کے درمیان آج ٹیلی فونک رابطہ ہوا۔
وزیراعظم شہباز نے ملائیشیاء کی متعدد ریاستوں میں موسلادھار بارشوں کی وجہ سے حالیہ سیلاب کے نتیجے میں ہونے والے جانی و مالی نقصان پر ملائیشیا کے برادرانہ عوام کے لئے اپنی گہری ہمدردی کا اظہار کیا ہے۔ انہوں نے ملائیشیاء کے وزیر اعظم کو یقین دلایا کہ پاکستان کے عوام مشکل کی اس گھڑی میں اپنے ملائیشین بھائیوں اور بہنوں کے ساتھ کھڑے ہیں۔ وزیراعظم نے اس قدرتی آفت سے نمٹنے کے حوالے سے ملائیشین حکومت کی تیز تر اور مؤثر اقدامات کی تعریف کی۔
وزیراعظم نے ملائیشیاء کو ہر ممکن مدد کی پیشکش کی اور اپنے ملائیشیاء کے بہن بھائیوں کے لیے پاکستان کی حمایت کی علامت کے طور پر فوری طور پر انسانی امداد بھیجنے کا اعلان کیا۔
اس سال اکتوبر میں وزیر اعظم انور ابراہیم کے حالیہ دورہ پاکستان کا ذکر کرتے ہوئے، وزیر اعظم نے دو طرفہ تعلقات کی مثبت رفتار پر اطمینان کا اظہار کیا اور باہمی دلچسپی کے تمام شعبوں میں دوطرفہ تعاون کو مزید مضبوط بنانے کے لیے پاکستان کے عزم کا اعادہ کیا۔ انہوں نے اس امر پر اطمینانکا اظہار کیا کہ ملائیشیاء کے وزیر اعظم کے دورہء پاکستان کے دوران جن تجارتی مسائل کی نشاندہی کی گئی تھی ان میں سے بیشتر کو خوش اسلوبی سے حل کر لیا گیا ہے۔
ملائیشیاء کے وزیر اعظم نے پاکستان کی حمایت پر وزیر اعظم کا شکریہ ادا کیا اور اس بات پر اتفاق کیا کہ دونوں ممالک کو تمام اہم شعبوں میں تعلقات کو آگے بڑھانے کے لیے مل کر کام کرنے کی ضرورت ہے۔
دونوں رہنماؤں نے اعلیٰ سطحی دوروں کو جاری رکھنے پر بھی اتفاق کیا، وزیراعظم کی سطح کے ساتھ ساتھ نائب وزیر اعظم و وزیر خارجہ کے اگلے سال کے شروع میں کوالالمپور کا دورہ کرنے کی توقع ہے۔
*
