اسلام آباد۔28نومبر :وزیراعظم محمد شہباز شریف نے کہا ہے کہ قومی سلامتی کا براہ راست تعلق معاشی سلامتی سے ہے، سٹاک ایکسچینج میں تاریخی ریکارڈ اضافہ، مہنگائی کی شرح میں کمی، آئی ٹی سمیت دیگر شعبوں میں برآمدات اور ترسیلات زر میں نمایاں اضافہ ہوا ہے، اپنی تمام توانائیاں اور وسائل ملکی معیشت کے استحکام کیلئے بروئے کار لا رہے ہیں، زراعت، صنعت، برآمد کنندگان اور حکومت کو ملکی ترقی کیلئے مل کر کام کرنا ہو گا، اسلام آباد میں مسلح لشکر کشی کے ذریعے غیر یقینی اور افراتفری پیدا کرنے کی کوشش کی گئی، پاکستان کے دشمن سب کچھ تباہ کرنا چاہتے ہیں۔ ان خیالات کا اظہار انہوں نے جمعرات کو نیشنل ڈیفنس یونیورسٹی میں 26ویں سکیورٹی ورکشاپ سے خطاب کرتے ہوئے کیا۔ وزیراعظم شہباز شریف نے کہا کہ قومی سلامتی کا براہ راست تعلق معاشی سلامتی سے ہے، دونوں ساتھ ساتھ ہیں، سٹاک ایکسچینج آج ایک لاکھ پوائنٹس کی حد عبور کر گیا، وفاقی حکومت اور تمام فریقوں کے درمیان مربوط روابط اور ٹیم کی انتھک کوششوں کے باعث یہ کامیابی حاصل ہوئی ہے، یہ کاروباری رجحان ہے، ملک درست سمت میں گامزن ہے، گذشتہ سے پیوستہ روز جو کچھ اسلام آباد میں ہوا اس سے سٹاک ایکسچینج 4 ہزار پوائنٹس گر گئی، احتجاج ختم ہونے کے بعد گذشتہ روز اس میں 3 ہزار پوائنٹس کا اضافہ ہوا ہے اور آج ایک لاکھ پوائنٹس کی حد عبور کرنا تاریخی ریکارڈ ہے۔ انہوں نے کہا کہ برآمدات اور صنعتوں میں اضافہ ہو رہا ہو، پیداواری ملازمتوں کے مواقع مل رہے ہوں، بیورو کریسی فعال کارکردگی کا مظاہرہ کر رہی ہو تو معاشی سلامتی خود بخود مضبوط ہوتی ہے، بدقسمتی سے ماضی میں معاشی ترقی سست رہی، اس کی مختلف وجوہات ہیں، اس میں سے خلوص سے پالیسیوں پر عملدرآمد نہ کرنا، محنت اور انتھک کوششوں کی کمی شامل ہیں، اس کے ساتھ ساتھ ذہین پیشہ وارانہ کاروباری افراد، اساتذہ اور ماہرین کے ہونے کے باوجود معیشت گرتی گئی۔ انہوں نے کہا کہ ہمیں اب بھی کئی چیلنجوں کا سامنا ہے، جون 2023ء میں پاکستان کے دیوالیہ ہونے کا خطرہ تھا، اس پر ہم نے سیاسی پوائنٹ سکورنگ نہیں کی اور آئی ایم ایف کے ساتھ جامع مذاکرات کرکے ملک کو دیوالیہ ہونے سے بچایا، ہمارے پاس اس کے علاوہ کوئی راستہ نہیں تھا، آئی ایم ایف کے ساتھ دوبارہ مذاکرات کئے گئے۔ انہوں نے کہا کہ ماضی میں منصوبے بنا کر نظر انداز کئے گئے، ہم اپنے منصوبوں پر من و عن عملدرآمد کریں گے، ہوم گراؤنڈ پلان بنایا گیا ہے، پوری پاکستانی قوم سے مل کر اس منصوبے پر عمل کریں گے۔ انہوں نے کہا کہ ملک کا معاشی منظرنامہ
انتھک محنت اور کوششوں سے تبدیل کیا جا سکتا ہے، معاشی چیلنجز کے ساتھ ساتھ سکیورٹی چیلنجز کا بھی سامنا ہے، پاک فوج، قانون نافذ کرنے والے اداروں اور پوری قوم نے دہشت گردی کو شکست دینے کیلئے قربانیاں دیں، سابق وزیراعظم محمد نواز شریف کے دور میں ملک کی بہادر افواج، قانون نافذ کرنے والے اداروں اور عوام نے دہشت گردی کو شکست دی، دہشت گردی کے خلاف جنگ میں 80 ہزار افراد شہید ہوئے اور 130 ارب ڈالر کا معاشی نقصان ہوا، ہمیں ان نقصانات کے اثرات کا سامنا کرنا پڑا۔ انہوں نے کہا کہ خیبرپختونخوا اور بلوچستان میں دہشت گردی کے واقعات ہو رہے ہیں، پاکستان دشمن عناصر پاکستان کے دشمنوں سے مل کر اپنے مذموم ایجنڈے پر کام کر رہے ہیں، پارا چنار میں بے گناہ پاکستانیوں کو قتل کیا گیا۔ انہوں نے کہا کہ اسلام آباد میں لشکر کشی کی گئی، احتجاج کی آڑ میں ہزاروں لوگوں نے ہتھیاروں اور اسلحہ کے ساتھ دھاوا بوالا جس سے غیر یقینی اور افراتفری پیدا ہوئی، وہ معاشی استحکام کو تباہ کرنا چاہتے تھے۔ وزیراعظم نے کہا کہ مہنگائی کی شرح 32 فیصد سے کم ہو کر 7 فیصد پر آ گئی ہے، برآمدات میں بتدریج اضافہ ہو رہا ہے، ترسیلات زر، آئی ٹی برآمدات میں نمایاں اضافہ ہوا ہے، یہ پاکستانی عوام کا خواب تھا، پاکستان کے دشمن سب کچھ تباہ کرنا چاہتے ہیں۔ انہوں نے کہا کہ ہمارے پاس محدود آپشن ہیں، ہم اپنی تمام توانائیاں اور وسائل ملکی معیشت کے استحکام کیلئے بروئے کار لا رہے ہیں۔ شہباز شریف نے کہا کہ ہم متحد ہو کر ملک کا مستقبل خوشحال بنا سکتے ہیں۔ بعد میں شرکاء کے سوالات کے جواب دیتے ہوئے انہوں نے کہا کہ بیرونی خسارہ میں فرق کو کم کرنے کیلئے برآمدات کو بڑھانا ناگزیر ہے، اس وقت ترسیلات زر 30 ارب ڈالر ہیں اور اس کے برابر برآمدات ہیں، برآمدات پر مبنی پالیسی پر عمل پیرا ہیں، جب تک اپنے وسائل نہیں بڑھائیں گے تو اس وقت تک اپنی آنے والی نسلوں پر قرضوں کا بوجھ چڑھائیں گے، ایسا ہم نہیں کر سکتے، گیس اور پاور کے شعبوں میں گردشی قرضہ سمیت متعدد چیلنجز کا سامنا ہے، اس میں بجلی چوری سمیت متعدد عوامل شامل ہیں، ہم متحد ہو کر ان مسائل سے نمٹنے کیلئے بھرپور کوششیں کر رہے ہیں، بجلی چوری اور ادارہ جاتی خامیوں کے خاتمہ کیلئے متعلقہ وزارت کام کر رہی ہے، ہمیں ٹیکس نیٹ کو توسیع دینا ہے، ٹیکسوں میں تو اربوں روپے کی چوری ہو رہی ہے، ٹیکس ادا کرنے والوں کو سلام پیش کرتا ہوں، ان کی حوصلہ افزائی کیلئے اقدامات کئے، ہم نے عوام کو تعلیم اور صحت کی سہولیات فراہم کرنا ہیں، زراعت، صنعت، برآمد کنندگان اور حکومت کو ملکی ترقی کیلئے مل کر کام کرنا ہو گا۔ انہوں نے کہا کہ ایپکس کمیٹی نے فیصلہ کیا ہے کہ بلوچستان میں غیر ملکی حمایت سے جو سازش ہو رہی ہے ان کا خاتمہ ازحد ضروری ہے، بلوچستان میں آپریشن شروع ہو چکا ہے، یہ عزم استحکام کے تحت بلوچستان اور عوام کی ترقی و خوشحالی سے جڑا ہے۔ انہوں نے کہا کہ 2018ء کے انتخابات کے بعد قومی اسمبلی کے اجلاس میں میثاق معیشت کی تجویز دی تھی، آج پھر میثاق معیشت کی تجویز کا اعادہ کرتا ہوں، حکومت کاروبار نہیں کرتی بلکہ کاروبار کے فروغ کیلئے سازگار ماحول فراہم کرتی ہے، مختلف اداروں میں رائٹ سائزنگ اور ڈاؤن سائزنگ کر رہے ہیں، خسارے کا شکار سرکاری ملکیتی اداروں میں اربوں روپے کا نقصان ہوتا ہے، ان اربوں روپے کا نقصان بچائیں گے، حکومت، آرمی چیف جنرل سید عاصم منیر سمیت تمام اداروں کا اس بارے میں یکساں مؤقف ہے۔ انہوں نے کہا کہ وزیر اطلاعات کو اس معاملہ پر قوم کو آگاہ کرنے کیلئے جاندار بیانیہ وضع کرنے کا کہا ہے۔ انہوں نے کہا کہ 2010ء کے این ایف سی ایوارڈ کے تحت دہشت گردی کے خلاف جنگ میں خیبرپختونخوا کو تمام صوبے ایک فیصد حصہ دیتے ہیں، اب تک ان کو 600 ارب روپے مل چکے ہیں، ابھی تک وہاں سیف سٹی اور محکمہ انسداد دہشت گردی قائم نہیں کر سکتے، ہم سب کو مل کر ملک اور عوام کیلئے کام کرنا ہو گا، تمام قائدین اور اشرافیہ نے مل کر ملک کی تقدیر بدلنی ہے، یہ محنت، امانت اور دیانت سے ممکن ہے، ہم انتھک محنت اور لگن سے اپنی کامیابی حاصل کر سکتے ہیں۔ تقریب میں وفاقی وزرا، اعلیٰ عسکری حکام اور زندگی کے مختلف شعبوں سے تعلق رکھنے والے افراد نے شرکت کی۔
===================================
اسلام آباد: 28 نومبر، 2024.
وزیرِاعظم محمد شہباز شریف کی ضلع خیبر کے علاقے باغ میں خارجیوں کے خلاف کامیاب آپریشن پر سیکیورٹی فورسز کے افسران و اہلکاروں کی پذیرائی
وزیرِ اعظم کی خارجی سرغنہ سمیت چار خارجیوں کو جہنم واصل کرنے اور تین کو زخمی کرکے گرفتار کرنے پر سیکیورٹی فورسز کی پیشہ ورانہ صلاحیتوں کی تعریف.
دھشتگردی کی عفریت کے ملک سے مکمل خاتمے تک اس کے خلاف جنگ جاری رکھیں گے. وزیرِاعظم
دھشتگردی کے ملک سے خاتمے کیلئے پوری قوم سیکیورٹی فورسز کے شانہ بشانہ کھڑی ہے. وزیرِاعظم
=================================
اسلام آباد : 28 نومبر 2024
وزیراعظم محمد شہباز شریف کی زمبابوے کے خلاف ون ڈے کرکٹ سیریز میں فتح پر قومی کرکٹ ٹیم کو خراج تحسین
وزیراعظم کی کرکٹ ٹیم کی کامیابی پر قوم کو مبارکباد
قومی ٹیم نے شاندار کھیل پیش کر کے پوری قوم کی دل جیت لئے : وزیراعظم
امید ہے کامیابیوں کا یہ سلسلہ جاری رہے گا: وزیراعظم
===============================
اسلام آباد: 28 نومبر، 2024.
وزیرِاعظم محمد شہباز شریف کی زیرِ صدارت امن و امان کی صورتحال کے حوالے سے جائزہ اجلاس
اجلاس میں وزیرِ اعظم کو گزشتہ دنوں ملک میں دھرنوں کی صورت میں احتجاج کرنے والوں کی جانب سے سرکاری املاک اور پولیس و رینجرز کے اہلکاروں پر حملے پر بریفنگ دی گئی.
ملک میں تاریخی کرپشن اور اپنی حکومت بچانے کیلئے اسکو دیوالیہ کرنے والوں کی مزموم سازشیں رچنے والے قانون کی گرفت میں آئے. وزیرِ اعظم
قانونی راستہ اپنانے کی بجائے بارہا اسلام آباد کی طرف لشکر کشی کرکے ملک بھر میں انتشار کی فضاء پھیلانے کی کوشش کی گئی. وزیرِ اعظم
انتشاری ٹولے کی لشکر کشی کے دوران سیکیورٹی فورسز کے اہلکاروں کو زخمی اور شہید کیا گیا. وزیرِ اعظم
یہ کیسے انقلابی ہیں جو اس ملک کی تباہی اور انتشار پھیلانے کی مزموم کوشش کر رہے ہیں. وزیرِ اعظم
اسلام آباد پر لشکر کشی کرنے والے شرپسند ٹولے کے خلاف فوری قانونی چارہ جوئی کی جائے. وزیرِاعظم
اس حوالے سے استغاثہ کے نظام میں مزید بہتری لائی جائے. وزیرِاعظم
شرپسند ٹولے کے منتشر ہوتے ہی اسٹاک ایکسچینج ایک لاکھ پوائنٹس کراس کر گئی. وزیرِ اعظم
اس انتشار پھیلانے کی مزموم کوششوں کے نتیجے میں ملک کو اربوں روپے کا نقصان ہوا. وزیرِاعظم
ملک کو معاشی نقصان کے ذمہ دار انتشاری ٹولہ اور اسکے کرتا دھرتا ہیں. وزیرِاعظم
انتشاری ٹولے میں شرپسند عناصر کی فوری شناخت کرکے انکو قرار واقعی سزا دلوائی جائے. وزیرِ اعظم
انتشاری ٹولے کی لشکر کشی کے دوران اپنے فرائض کی انجام دہی کرتے جام شہادت نوش کرنے والے اہلکاروں کو مجھ سمیت پوری قوم خراج عقیدت پیش کرتی ہے. وزیرِاعظم
اسلام آباد یا ملک کے کسی بھی شہر پر ذاتی مقاصد کے حصول کیلئے لشکر کشی کو روکنے کیلئے جامع حکمت عملی مرتب کی جائے. وزیرِاعظم کی ہدایت
حکومت نے نام نہاد پر امن دھرنے کے مسلح افراد کو انتشار پھیلانے سے روکنے میں برداشت کا مظاہرہ کیا. وزیرِاعظم
آئندہ ایسی کسی بھی صورتحال سے نمٹنے کیلئے ایک جامع لائحہ عمل مرتب کرکے پیش کیا جائے. وزیرِ اعظم
گزشتہ دنوں کے واقعات میں عوام میں اشتعال، بے یقینی اور انتشار پھیلانے والے عناصر کو قانون کے کٹھرے میں لایا جائے. وزیرِاعظم
بلوائیوں سے نمٹنے کیلئے اسلام آباد اور ملک بھر میں اینٹی روائٹس (Anti Riots) فورس قائم کی جائے. وزیرِاعظم
فورس کو بین الاقوامی طرز پر پیشہ ورانہ تربیت اور ضروری سازوسامان سے لیس کیا جائے. وزیرِاعظم
سرکاری و نجی املاک کو نقصان پہنچانے والوں کے ساتھ ساتھ مسلح افراد کی نشاندہی کرکے ان کے خلاف قانونی کاروائی عمل میں لائی جائے. وزیرِاعظم
اجلاس میں وفاقی وزراء احد خان چیمہ، عطاء اللہ تارڑ، مشیر وزیرِ اعظم رانا ثناء اللہ، اٹارنی جنرل اور متعلقہ اعلی حکام نے شرکت کی.
