اعتصام الحق ثاقب
چین کے اسٹیٹ پوسٹ بیورو کے تازہ ترین اعداد و شمار کے مطابق 2024 میں چین کی ایکسپریس ڈیلیوری کا حجم نومبر کے دوسرے ہفتے میں پہلی بار 150 بلین پارسل کی حد کو عبور کر چکا ہے ۔اس کامیابی کی وجہ ملک کی تیزی سے بڑھتی ہوئی کورئیر مارکیٹ اور اوسط آمدنی والے آبادی کے ایک گروپ کو قرار دیا جا رہا ہے ۔تفصیلات کے مطابق اس سال چین میں فی شخص موصول ہونے والی اوسط ایکسپریس ڈیلیوری نے 100 سے تجاوز کر لیا ہے ۔یعنی ایک عام زبان میں ہم کہ سکتے ہیں کہ ایک فرد نے تقریبا 100 پارسلز آرڈر کیے ۔اس تعداد کے ساتھ اگر ان پارسلز کی تیاری کی بات کی جائے تو فی سیکنڈ اوسطا 5,400 سے زیادہ ایکسپریس پیکیجز تیار کیے گئے ہیں جب کہ سب سے زیادہ یومیہ ایکسپریس ڈیلیوری کے حجم نے بھی حیرت انگیز 729 ملین کی تعداد کو پار کیا ہے ۔چین کے سٹیٹ بیورو کا کہنا ہے کہ اس سال کے آغاز سے ، مختلف محکموں اور علاقو ں نے کھپت کو فروغ دینے اور گھریلو مانگ کو بڑھانے کے لیے کئی معاون پالیسیاں وضع کی تھیں جن کے نتائج اس انداز میں شامنے آئے ہیں ۔سازوسامان کی اپ گریڈیشن اور صارفین کے سامان کے لیے ٹریڈ ان پروگراموں سمیت دیگر پالیسیوں نے ایکسپریس ڈیلیوری کے حجم میں نمایاں اضافہ کیا ہے ۔
“اس سال چین کی ایکسپریس ڈیلیوری انڈسٹری نے بھی اپنے بنیادی ڈھانچے کی اپ گریڈیشن کو تیز کیا ہے ۔ ایکسپریس کمپنیاں مختلف کاؤنٹیز کی سطح کے علاقوں میں ٹرانسفر سینٹرز اور سمارٹ سپلائی چین انڈسٹریل پارکس قائم کر رہی ہیں اور انہیں چلا رہی ہیں اور تقسیم کے مراکز کی تعداد بڑھانے کے ساتھ ساتھ ان کی تزئین و آرائش بھی کی جا رہی ہے ۔ مختلف اے آئی ٹیکنالوجیز کے انڈسٹری میں شامل ہونے کے بعد پیکجنگ کے وقت اے آئی کی مدد سے پارسلز کو چھانٹنے والے آلات کی تنصیب اور آپریشنل جگہوں کو بڑھا کر ، اس کی کارکردگی کو نمایاں طور پر بہتر بنایا گیا ہے اور پارسل کے وصول کنندہ تک ترسیل کے اوقات کو کم کیا گیا ہے ۔
چین کے وسطی اور مغربی علاقوں میں ایکسپریس ڈیلیوری کے حجم کے تناسب میں مسلسل اضافے کے ساتھ ، اس سال پوسٹل اور ایکسپریس ڈیلیوری انڈسٹری کا علاقائی ترقیاتی ڈھانچہ زیادہ متوازن ہو گیا ہے ۔ دور دراز علاقوں میں ای کامرس پلیٹ فارمز اور ایکسپریس کمپنیوں کے درمیان تعاون نے لاگت کو کم کیا ہے اور وسطی اور مغربی علاقوں میں مارکیٹ کو بڑھایا ہے ۔ اس سال کے آغاز سے ، وسطی اور مغربی علاقوں میں ایکسپریس ڈیلیوری مارکیٹ میں ترقی کی شرح نے قومی اوسط کو پیچھے چھوڑ ا ہے ، جس میں گانسو اور شانسی جیسے صوبوں میں 40 فیصد سے زیادہ کا اضافہ ہوا ہے ۔ ایکسپریس ڈیلیوری مارکیٹ کی مضبوط ترقی نے ان علاقوں میں آن لائن کھپت کی مانگ کو بڑھانے ، مقامی معیشتوں کو مضبوط بنانے اور معاشی بحالی کے مثبت رجحان کو تقویت دینے کے لیے مدد فراہم کرنے میں اہم کردار ادا کیا ہے ۔
تیزی سے بدلتی ہوئی اس دنیا میں نئے نئے انداز میں لوگوں کی مانگ اور کھپت کو پورا کرنے کے لیے یہ تجربات مارکیٹ میں خریدنے اور بیچنے والوں کے رجحانات کو ایک نئی اور منفرد سطح پر لے جا رہے ہیں جہاں آگے سے آگے بڑھنے کی دوڑ میں دنیا مزید نئے تجربات دیکھتی رہے گی لیکن اس تمام صورتحال میں گاہکوں کے اعتماد کی جیت اور ان کا اطمینا ن ہی کامیابی کی اصل کنجی رہے گی
