دس وکٹو ں سے ایک اور کامیابی

(تحریر: نوید انجم فاروقی)
پاکستان اور زمبابوے کے درمیان جاری تین ایک روزہ میچوں کی سیریز کے پہلے میچ میں بارش کے باعث میچ مکمل نہ ہونے کی صورت میں زمبابوے کو فاتح قرار دیا گیا۔ آج دوسرے ایک روزہ میچ میں پاکستان نے زمبابوے کو دس وکٹوں سے شکست دیکر نہ صرف اپنی ہار کا بدلہ لیا بلکہ سیریز بھی ایک ایک سے برابر کر دی۔ اَب سیریز کا فیصلہ آخری میچ میں ہوگا۔ آج کے میچ کی خاص بات صائم ایوب کی شاندار سنچری تھی۔ اُنھوں نے محض 62 گیندوں پر 113 رنز بنا کر قومی ٹیم کو فتح دلائی۔ اُنھوں نے اِس جارحانہ اننگزمیں 17 چوکے اور تین چھکے بھی لگائے۔
اِس میچ میں زمبابوے نے ٹاس جیت کر پہلے بیٹنگ کرتے ہوئے 32.3 اوورز میں محض 145 رنز بنائے اور اُس کے تمام کھلاڑی آؤٹ ہو گئے۔ پاکستان کی جانب سے ابرار احمد نے چار جبکہ سلمان آغا نے تین کھلاڑیوں کو آؤٹ کیا۔ جواب میں پاکستان نے اپنی اننگز کا جارحانہ آغاز کیا خاص طور پر صائم ایوب نے خوب ہاتھ دکھائے اور عبداللہ شفیق نے بھی اُن کا بھرپور ساتھ دیا۔ پاکستان نے محض 18.2 اوورز میں مطلوبہ ہدف حاصل کر لیا اور اُس کا کوئی کھلاڑی آؤٹ نہیں ہوا۔ صائم ایوب نے 113 اور عبداللہ شفیق نے 32رنز بنائے۔ یوں پاکستان کی کرکٹ ٹیم دس وکٹوں سے کامیاب ہوئی۔صائم ایوب کو مین آف دی میچ قرار دیا گیا۔
سیریز کا تیسرا اور آخری میچ 28 نومبر کو کھیلا جائے گا جس میں سیریز کے فاتح کا فیصلہ متوقع ہے۔ آج کی شاندار جیت کے بعد شائقین کرکٹ کو اُمید ہے کہ سیریز بھی پاکستان جیتے گا اور چیمپیئنز ٹرافی کیلئے اپنی تیاریوں کا شاندار سلسلہ جاری رکھے گا۔ یہ پاکستان کے نئے کپتان رضوان احمد کیلئے ایک اور فتخ ہے اِس سے قبل وہ آسٹریلیا کو اسٹریلیا میں ہرا چکے ہیں۔