جیکب آباد : رپورٹ ایم ڈی عمرانی
جیکب آباد پولیس کا کارنامہ، نم یونیورسٹی اسلام آباد کے شاگرد پر حملے کا جھوٹا مقدمہ درج، یونیورسٹی انتظامیہ کی جانب سے شاگرد کی موجودگی کا لیٹر جاری۔ تفصیلات کے مطابق جیکب آباد کے محمد پور تھانہ کی پولیس نے نمل یونیورسٹی اسلام آباد میں پڑھنے والے طالبعلم سرفراز جکھرانی پر جھوٹا مقدمہ درج کیا گیا ہے پولیس کی جانب سے درج مقدمے میں شاگرد کے ہاتھ میں پستول بھی ظاہر کی گئی ہے جبکہ شاگرد 13 ستمبر کو یونیورسٹی میں موجود تھا جس کی یونیورسٹی میں حاضری بھی موجود ہے، جبکہ مقدمہ درج ہونے کے بعد نمل یونیورسٹی انتظامیہ نے شاگرد کی یونیورسٹی میں موجودگی کے متعلق ایک لیٹر بھی جاری کردیا ہے، یونیورسٹی کے لیٹر میں لکھا گیا ہے کہ شاگرد سرفراز احمد جکھرانی 9 ستمبر سے مسلسل یونیورسٹی میں موجود ہے جس کی حاضری رجسٹر میں دستخط بھی موجود ہیں، اس سلسلے میں شاگرد سرفراز جکھرانی نے بتایا کہ میری نمل یونیورسٹی میں پاکستان اسٹیڈی میں داخلہ ہے میں فرسٹ ائیر کا شاگرد ہوں نمل یونیورسٹی میں موجودگی کے باوجود مجھ پر جھوٹا مقدمہ درج کرکے میرے مستقبل سے کھیلنے کی کوشش کی گئی ہے، انہوں نے مطالبہ کیا کہ جھوٹا مقدمہ ختم کرکے ملوث پولیس کے خلاف کاروائی کی جائے، رابطے پر ایس ایچ او محمد پور منظور لاشاری نے کہا کہ نثار جکھرانی کی مدعیت میں حملے کا مقدمہ درج کیا گیا ہے جس میں شاگرد کا نام شامل ہونے کا معلوم نہیں تھا اب شواہد ملنے کے بعد مقدمے سے شاگرد کا نام خارج کیا جائے گا۔
جیکب آباد پولیس کا مقابلے کے بعد ایک ملزم کو زخمی حالت میں گرفتار کرنے کا دعویٰ۔ تفصیلات کے مطابق جیکب آباد کے مولاداد پولیس کی جانب سے مقابلے کے بعد ایک ملزم کو زخمی حالت میں گرفتار کرنے کا دعویٰ کیا گیا ہے، پولیس ترجمان کے مطابق مولاداد پولیس کا قادرپور موڑ کے قریب 5 ڈاکوؤں سے مقابلہ ہوگیا پولیس کی جوابی فائرنگ سے سلطان کوٹ کے رہائشی ایک ملزم عبدالجبار سندرانی کو زخمی حالت میں گرفتار کرلیا گیا ہے جبکہ اس کے دیگر ساتھی فرار ہونے میں کامیاب ہوگئے جن کی گرفتاری کے لیے چھاپے مارے جارہے ہیں، پولیس نے گرفتار ملزم کے قبضے سے اسلحہ اور موٹر سائیکل بھی برآمد کرنے کا دعویٰ کیا جارہا ہے،
جیکب آبادجمس اسپتال میں ادویات کی قلت، مریضوں سے نارواسلوک اور ایمرجنسی کا شعبہ بحال نہ ہونے کے خلاف پی پی شہید بھٹو کا دوسرے روز بھی احتجاج، جمس اسپتال کے گیٹ کے پاس بھوک پڑتالی کیمپ قائم۔ تفصیلات کے مطابق جیکب آباد میں پیپلز پارٹی شہید بھٹو کی جانب سے جمس اسپتال میں ادویات کی قلت، کرپشن، مریضوں سے نارواسلوک اور ایمرجنسی کا شعبہ بحال نہ ہونے کے خلاف دوسرے روز بھی احتجاج کیا گیا، کارکنان نے شہر کے مختلف راستوں پر مارچ کرنے کے بعد جمس اسپتال کے گیٹ کے قریب بھوک ہڑتالی کیمپ قائم کرکے علامتی بھوک ہڑتال کی، مظاہرین نے جمس اسپتال کی انتظامیہ کے خلاف نعریبازی کی، اس موقع پر شہزاد احمد سومرو، ظفر جکھرانی، نور محمد منجھو اور دیگر نے کہا کہ جمس اسپتال کو بین الاقوامی اسٹینڈر پر بنایا گیا ہے لیکن انتظامیہ کی نااہلی کی وجہ سے جمس اسپتال کو تباہی کے کنارے پر پہنچایا دیا گیا ہے مریضوں کو ادویات فراہم نہیں کی جارہی، اسٹاف کا مریضوں سے رویہ بھی درست نہیں جبکہ کرپشن کی وجہ سے جمس اسپتال عوام کے لیے بے سود بن چکی ہے، انہوں نے کہا کہ جمس اسپتال سیکورٹی انچارج عباس مغیری کے حوالے ہوچکی ہے جس نے جمس اسپتال کو تباہ کرنے میں کوئی کسر نہیں چھوڑی، انہوں نے مطالبہ کیا کہ کرپٹ عملے کو ہٹا کر جمس اسپتال کو تباہی سے بچایا جائے۔
جیکب آباد پارا چنار واقعے کے خلاف وکلاء کا عدالتی کاروائی کا بائیکاٹ، احتجاجی مظاہرہ۔ تفصیلات کے مطابق جیکب آباد میں ڈسٹرکٹ بار ایسوسی ایشن کی جانب سے پارا چنار واقعہ کے خلاف عدالتی کاروائیوں کا بائیکاٹ کیا گیا جبکہ ایڈوکیٹ ظفر رند، زاہد سومرو، غلام حسین شاہ، عبدالرحمن مغل، کامران سولنگی کی قیادت میں احتجاجی مظاہرہ کیا گیا، اس موقع پر مظاہرین نے کہا کہ پارا چنار میں ظلم کی انتہا کردی گئی ہے معصوم بچوں و خواتین کو بھی بے دردی سے قتل کیا گیا ہے لیکن قانون نافذ کرنے والے ادارے ملوث دہشت گردوں کو گرفتار کرنے میں ناکام ہوچکے ہیں انہوں نے مطالبہ کیا کہ پارا چنار واقعہ میں ملوث دہشت گردوں کو فلفور گرفتار کرکے امن و امان کو بحال کیا جائے۔
