برطانوی ہائی کمشنر نے پنجاب حکومت کے اقدامات کو سراہا
لاہور: 22 نومبر :: صوبائی وزیر برائے اقلیتی امور رمیش سنگھ اروڑہ نے اپنے دفتر میں برطانوی ہائی کمشنر جین میریاٹ سے ملاقات کی۔ اس ملاقات میں پاکستان خصوصاً پنجاب میں مذہبی اقلیتیوں کے حقوق کی حفاظت اور ان کے مسائل پر بات چیت کی گئی۔ صوبائی وزیر نے اس موقع پر پنجاب حکومت کی جانب سے مذہبی اقلیتیوں کی فلاح و بہبود کے لیے کیے گئے اقدامات کا جائزہ پیش کیا اور بتایا کہ محکمہ کے پلیٹ فارم سے مذہبی اقلیتیوں کی معاشی ترقی اور ان کے سماجی و اقتصادی معیار کو بہتر بنانے کے لیے ایک پانچ سالہ اسٹرٹیجک پلان متعارف کرانے جا رہے ہیں۔ انہوں نے اس بات پر زور دیا کہ پنجاب حکومت کی جانب سے اقلیتی کمیونٹی کی معاونت کے لیے اقلیتی کارڈز جاری کیے جائیں گے، جو کہ ایک اہم قدم ثابت ہوگا ۔ وزیر نے مزید بتایا کہ وزیراعلیٰ پنجاب نے اعلیٰ تعلیم کمیشن (HEC) کے ذریعے لیپ ٹاپ تقسیم کرنے کے منصوبے کا اعلان کیا ہے جس میں مذہبی اقلیتیوں کو بھی جدید تعلیمی وسائل فراہم کئیے جائیں گے۔ اس کے علاوہ ٹیکنیکل تربیتی کورسز اور ڈیجیٹل لٹریسی پلیٹ فارم بھی شروع کیے گئے ہیں تاکہ اقلیتیوں کی مہارتوں اور روزگار کے مواقع میں اضافہ ہو سکے۔
رمیش اروڑہ نے پنجاب حکومت کی جانب سے مذہبی عبادت گاہوں کے تحفظ کے لیے کیے گئے اقدامات کا بھی ذکر کیا اور بتایا کہ صوبائی حکومت سیکیورٹی ایجنسیوں کے ساتھ مل کر مذہبی مقامات کے تحفظ کے لیے جامع تدابیر کر رہی ہے۔ انہوں نے بتایا کہ وزیراعلیٰ پنجاب اس بات پر گہری تشویش رکھتی ہیں کہ مذہبی عبادت گاہوں کی حفاظت کی جائے اور اس سلسلے میں مؤثر اقدامات کیے جا رہے ہیں۔
صوبائی وزیر نے برطانوی ہائی کمشنر سے محکمہ انسانی حقوق و اقلیتی امور کی صلاحیت سازی کے لیے برطانوی کونسل کے ساتھ تعاون کی درخواست کی۔ انہوں نے کہا کہ بین الاقوامی شراکت داریوں کا محکمہ کی کوششوں کو مزید مستحکم بنانے میں اہم کردار ہے۔ملاقات میں بابا گرو نانک کی 555ویں سالگرہ کی تقریبات میں شریک ہونے والے سکھ یاتریوں کا ذکر بھی کیا گیا۔ وزیر نے بتایا کہ برطانیہ، یورپ، کینیڈا اور بھارت سے بڑی تعداد میں سکھ یاتریوں نے پنجاب کا دورہ کیا، جو دونوں خطوں کے درمیان مضبوط ثقافتی اور مذہبی تعلقات کو ظاہر کرتا ہے۔
برطانوی ہائی کمشنر جین میریاٹ نے پنجاب حکومت کی اقلیتیوں کے حقوق کے تحفظ کے لیے کی جانے والی کوششوں اور وزیراعلیٰ پنجاب کی قیادت کو سراہا۔ انہوں نے محکمہ کی صلاحیت سازی کے لیے مکمل تعاون کی یقین دہانی کرائی اور پاکستان اور برطانیہ کے درمیان تعلیم، صحت اور مذہبی آزادیوں کے تحفظ کے شعبوں میں تعاون بڑھانے کا عزم ظاہر کیا۔
پریس ریلیز
وزیراعلی پنجاب کی ہدایت پر رمیش سنگھ اروڑہ کا سکھ یاتریوں کے وفد کا استقبال
بھارتی وفد مختلف گوردواروں میں مذہبی رسومات ادا کریں گے
لاہور، 22 نومبر – وزیراعلیٰ پنجاب کی ہدایت پر صوبائی وزیر اقلیتی امور، رمیش سنگھ اروڑہ واہگہ بارڈر پہنچ گئے، جہاں انہوں نے بھارتی سکھ یاتریوں کے وفد کا استقبال کیا۔ یہ وفد واہگہ بارڈر کے ذریعے پنجاب پہنچا اور پانچ روزہ دورے کے دوران مختلف گوردواروں میں مذہبی رسومات کی ادائیگی کرے گا۔
وفد کی قیادت کنولجیت سنگھ چیمہ نے کی جبکہ اس وفد میں گربچن ہر بھجن بھندر، سکھ پل چیمہ اور ونیت چیمہ بھی شامل ہیں۔ وفد نے صوبائی وزیر کو بابا گرو نانک کی سالگرہ کی مبارکباد پیش کی اور پنجاب میں سکھ یاتریوں کے لیے بہترین انتظامات کی تعریف کی۔
رمیش سنگھ اروڑہ کا اس موقع پر کہنا تھا کہ پنجاب میں لگ بھگ 60 ہزار سکھ یاتریوں نے مختلف تقریبات میں حصہ لیا، جن میں برطانیہ، امریکہ، کینیڈا اور دیگر ممالک سے خصوصی طور پر سکھ یاتریوں نے شرکت کی۔
صوبائی وزیر رمیش سنگھ اروڑہ نے مزید بتایا کہ حکومت گوردواروں کی قابض زمینوں کو واگزار کروا رہی ہے تاکہ سکھ کمیونٹی کے مذہبی مقامات کی حفاظت کی جا سکے۔ بھارتی وفد نے پاکستان کی دھرتی کو سکھ کمیونٹی کے لیے مقدس قرار دیتے ہوئے کہا کہ وہ تاخیر سے پہنچے ہیں مگر تمام گوردواروں کا دورہ کریں گے۔بعد ازاں، بھارتی وفد واہگہ بارڈر سے ننکانہ صاحب روانہ ہو گیا۔
