فلور کراسنگ پر ایم این اے عادل بازئی نااہل قرار
اسلام آباد: الیکشن کمیشن آف پاکستان نے فلور کراسنگ پر ایم این اے عادل بازئی کو نااہل قرار دے دیا۔
تفصیلات کے مطابق الیکشن کمیشن نے نااہلی سے متعلق درخواستوں پر محفوظ فیصلہ سناتے ہوئے فلور کراسنگ پر عادل خان بازئی کو ڈی سیٹ کرنے کا حکم دے دیا۔
عادل بازئی کوئٹہ سے آزاد حیثیت میں رکن قومی اسمبلی منتخب ہوئے تھے، انھوں نے کامیابی کے بعد پہلے ن لیگ میں شمولیت کا بیان حلفی جمع کرایا تھا لیکن چند روز بعد انھوں نے سنی اتحاد کونسل میں شمولیت کا بیان حلفی جمع کرایا۔
دوران سماعت عادل بازئی کے وکیل نے ن لیگ میں شمولیت کے بیانی حلفی کو جعلی قرار دیا تھا، تاہم فنانس بل اور آئینی ترمیم میں ووٹ نہ دینے پر نواز شریف نے ان کے خلاف نااہلی کا ریفرنس جمع کرایا تھا۔
اسپیکر قومی اسمبلی کی جانب سے نااہلی کا ریفرنس الیکشن کمیشن کو بھجوایا گیا تھا
===============================
لاہور کے نواحی علاقے مناواں میں لڑکے نے جھگڑے کے دوران لڑکی کو آگ لگا دی گئی۔
لڑکی کو آگ لگانے کا واقعہ ایک روز قبل پیش آیا تھا، متاثرہ کی مدعیت میں پولیس نے واقعے کا مقدمہ درج کر لیا ہے۔
متاثرہ لڑکی نے بتایا کہ حسن نے شادی کی نیت سے مجھے اپنے گھر رکھا ہوا تھا، ملزم اپنی بیوی کو اس کے گھر چھوڑ کر واپس آیا تو مجھ سے لڑنے لگا۔
ایف آئی آر میں لڑکی نے مؤقف اختیار کیا کہ ملزم نے پیٹرول چھڑک کر آگ لگائی جس سے خود بھی جھلس گیا۔
اس بارے میں پولیس کا کہنا ہے کہ ملزم حسن اور متاثرہ لڑکی ایک ہی گھر میں رہائش پذیر تھے، دونوں میں نکاح کرنے کے معاملے پر جھگڑا ہوا، زخمی لڑکی کو اسپتال منتقل کر دیا جبکہ ملزم بھی 20 فیصد جھلس گیا ہے۔
پولیس واقعے کی مزید تفتیش کر رہی ہے۔
