کراچی (اسٹاف رپورٹر) ٹائون میونسپل کارپوریشن چینسر ٹائون کی طرف سے سلیمان یوسف پارک میں مشاعرہ بعنوان “ازراہ سخن”کا انعقاد کیا گیا۔ چیئرمین چنیسر ٹائون فرحان غنی کی میزبانی میں منعقدہ اس مشاعرہ میں پاکستان بھر کے شعراء کرام نے شرکت کی اور اپنے کلام پیش کرکے حاضرین سے داد وصول کی۔ مشاعرہ کی صدارت سنئیر اور بزرگ شاعر انور شہور نے کی۔ جبکہ شعراء کرام میں جاوید صبا، اکرام عارفی، کاشف حسین، فاضل جمالی، علی زریعون، رمزی عاصم، توفیق تقی، تہذیب حافی، عمیر نجمی، زاہد بشیر، ضیاء مزخور، ضرنیگر عباس، جون حسن، مالی وسان و دیگر شامل تھے۔ تقریب میں رکن قومی اسمبلی اسد عالم نیازی، وزیر اعلٰی سندھ کے معاون خصوصی سید وقار مہدی، ارکان سندھ اسمبلی آصف موسی، محمد آصف خان، ڈپٹی اسپیکر سندھ اسمبلی انتھونی نوید، مختلف ٹائونز کے چیئرمینز، پیپلز پارٹی ڈسٹرکٹ ایسٹ کے صدر اقبال ساندھ، ڈسٹرکٹ سینٹرل کے صدر سردار خان سمیت دیگر پارٹی رہنمائوں کے علاوہ خواتین اور نوجوانوں و بزرگوں کی بڑی تعداد نے شرکت کی۔ اس موقع پر خطاب کرتے ہوئے چیئرمین چنیسر ٹائون فرحان غنی نے کہا کہ کراچی مشاعرہ ایونٹ کروانا میرے لئے اعزاز ہے، اس مشاعرہ میں ملک کے نامور شعراء کرام شریک ہیں یہ بھی کسی اعزاز سے کم نہیں ہے۔ انہوں نے کہا کہ سیاسی لوگ صرف سیاست ہی نہیں ادب اور شعر و شاعری کے ایونٹ بھی کرسکتے ہیں اور یہ مشاعرہ کراچی کے عوام کے لیے سجایا ہے۔ فرحان غنی نے کہا کہ کراچی میں کسی ٹائون کے تحت یہ پہلا مشاعرہ سجایا گیا ہے اور یہ اعزاز چینسر ٹائون کو جاتا ہے اور مجھے امید ہے کہ کراچی کے دیگر 24 ٹائونز بھی اس شہر کے عوام کے لئے اس طرح کے ایونٹ کا انعقاد کریں گے۔ انہوں نے کہا کہ چنیسر ٹاؤن مستقبل میں مزید اس طرح کے ایونٹ کرائیں گا اور آئندہ کے ایونٹس میں قوالی نائٹس و دیگر پروگرام کا انعقاد کیا جائے گا۔ فرحان غنی نے کہا کہ چنیسر ٹاؤن کے تحت شاہین فٹبال گرائونڈ میں فٹبال ٹورنامنٹ کا انعقاد کیا گیا اور آج یہ مشاعرے کا انعقاد کیا گیا ہے، کیونکہ ہم سیاست نہیں عوام کی خدمت پر یقین رکھتے ہیں اور ہم عوام کو صحت مند تفریحی سہولیات کی فراہمی کو یقینی بنانا چاہتے ہیں۔ اس موقع پر شعراء کرام نے اپنی شاعری سے ہزاروں کی تعداد میں موجود حاضرین محفل کو محظوظ کیا۔ تقریب کے اختتام پر شعراء کرام کو شیلڈز اور اجرک کے تحفہ پیش کئے گئے۔
